'ജോ ബൈഡന്‍ ഡ്രാഗണ്‍ ഫ്രൂട്ടിനൊപ്പം': പേരുമാറ്റത്തെ ട്രോളില്‍ മുക്കി സാമൂഹിക മാധ്യമങ്ങള്‍

കോഴിക്കോട് | ചൈനീസ് പഴമായ ഡ്രാഗണ്‍ ഫ്രൂട്ടിന്റെ പേര് ഗുജറാത്ത് സര്‍ക്കാര്‍ കമലം എന്നാക്കിയതില്‍ ട്രോളുകളുമായി സാമൂഹിക മാധ്യമങ്ങള്‍. അമേരിക്കന്‍ പ്രസിഡന്റ് ജോ ബൈഡനും വൈസ് പ്രസിഡന്റ് കമല ഹാരിസുമുള്ള ചിത്രത്തിന് “ബൈഡന്‍ ഡ്രാഗണ്‍ ഫ്രൂട്ടിനൊപ്പം” എന്നാണ് ഒരു വിരുതന്‍ അടിക്കുറിപ്പ് നല്‍കിയത്. ഡ്രാഗണ്‍ എന്ന പേരുള്ള സിനിമാ പോസ്റ്ററുകളെല്ലാം കമലം എന്നാക്കിയാണ് പരിഹാസം.

ഹോളിവുഡ് സിനിമകളിലെ പല പേരുകളും ഇങ്ങനെ മാറ്റിയുള്ള മീമുകള്‍ ട്വിറ്ററില്‍ നിറഞ്ഞിട്ടുണ്ട്. ടിക്കറ്റ് ബുക്കിംഗ് പ്ലാറ്റ്‌ഫോം ആയ ബുക്ക്‌മൈഷോയും ട്രോളില്‍ പങ്കെടുത്തു. ഡ്രാഗണ്‍ എന്നുപേരുള്ള സിനിമാ പോസ്റ്ററുകള്‍ വെട്ടി കമലം എന്ന് ചേര്‍ത്താണ് ബുക്ക്‌മൈഷോയുടെ ട്രോളുള്ളത്.

കമലം എന്ന ഹാഷ്ടാഗ് ട്വിറ്ററില്‍ ട്രെന്‍ഡിംഗ് ആയിട്ടുണ്ട്. ട്രെന്‍ഡിംഗില്‍ മൂന്നാം സ്ഥാനത്താണുള്ളത്.