ഉറങ്ങിക്കിടക്കുന്നവരുടെ മുകളിലേക്ക് ട്രക്ക് പാഞ്ഞുകയറി 15 പേര്‍ മരിച്ചു

അഹമ്മദാബാദ് | ഗുജറാത്തിലെ സൂറത്തില്‍ ഫുട്പാത്തില്‍ ഉറങ്ങിക്കിടക്കുകയായിരുന്ന തൊഴിലാളികള്‍ക്ക് മുകളിലേക്ക് ട്രക്ക് പാഞ്ഞുകയറി 15 പേര്‍ മരിച്ചു. അഞ്ച് പേര്‍ക്ക് ഗുരുതരമായി പരുക്കേറ്റു. സൂറത്തിന് 60 കിലോമീറ്റര്‍ അകലെ കൊസാമ്പ ഗ്രാമത്തില്‍ ഇന്ന് പുലര്‍ച്ചെയാണ് അപകടമുണ്ടായത്. കരിമ്പ് കയറ്റിവന്ന ഒരു ട്രാക്റ്ററുമായി കൂട്ടിയിടിച്ച് നിയന്ത്രണംവിട്ട ട്രക്ക് ഇവരുടെ ദേഹത്ത് കയറി ഇറങ്ങുകയായിരുന്നു. 12 പേര്‍ സംഭവസ്ഥലത്തുവെച്ചും മൂന്ന് പേര്‍ ആശുപത്രിയില്‍ വെച്ചുമാണ് മരിച്ചത്. പരുക്കേറ്റ പലരുടേയും നില ഗുരുതരമാണ്.

രാജസ്ഥാനില്‍ നിന്നുള്ള തൊഴിലാളികളാണ് അപകടത്തില്‍പ്പെട്ടത്. സംഭവത്തില്‍ ഗുജറാത്ത് സര്‍ക്കാര്‍ അന്വേഷണത്തിന് ഉത്തരവിട്ടു. സംഭവത്തില്‍ പ്രധാനമന്ത്രി നരേന്ദ്രമോദി നടുക്കം രേഖപ്പെടുത്തി.