Connect with us

National

ഡി എം കെ യുവജന വിഭാഗം നേതാവ് ഉദയനിധി സ്റ്റാലിന്‍ അറസ്റ്റില്‍; പോലീസ് നടപടി തിരഞ്ഞടുപ്പ് പ്രചാരണ റാലിക്കിടെ

Published

|

Last Updated

ചെന്നൈ | തമിഴ്‌നാട്ടില്‍ ഡി എം കെ തലവന്‍ എം കെ സ്റ്റാലിന്റെ മകനും പാര്‍ട്ടിയുടെ യുവജന വിഭാഗം നേതാവുമായ ഉദയനിധി സ്റ്റാലിനെ പോലീസ് അറസ്റ്റ് ചെയ്തു. സംസ്ഥാനത്ത് അടുത്ത വര്‍ഷം ഏപ്രില്‍-മെയ് മാസങ്ങളില്‍ നടക്കുന്ന തിരഞ്ഞെടുപ്പിന്റെ പ്രചാരണത്തിന് ആരംഭം കുറിച്ചുകൊണ്ടുള്ള ഡി എം കെ റാലി തടഞ്ഞാണ് അറസ്റ്റ്. റാലിക്ക് അനുമതി വാങ്ങിയിരുന്നില്ലെന്നും കൊവിഡ് പ്രോട്ടോക്കോള്‍ ലംഘിക്കപ്പെട്ടുവെന്നും ആരോപിച്ചാണ് പോലീസ് നടപടി സ്വീകരിച്ചത്. നാഗപട്ടണം ജില്ലയില്‍ നിന്നാണ് സ്റ്റാലിനെ അറസ്റ്റ് ചെയ്തത്.

സംസ്ഥാനത്തെ എ ഐ എ ഡി എം കെ സര്‍ക്കാറിന്റെ കെടുകാര്യസ്ഥതകള്‍ പൊതു സമൂഹത്തെ അറിയിക്കുക ലക്ഷ്യം വച്ചാണ് 75 ദിവസം നീളുന്ന പ്രചാരണ പരിപാടികള്‍ക്ക് തുടക്കം കുറിച്ചത്. തമിഴ്‌നാട്ടില്‍ പരന്നിട്ടുള്ള ഇരുട്ട് നീക്കുന്നതിനുള്ള തന്റെ പിതാവിന്റെ സന്ദേശം ഏറ്റെടുത്താണ് സംസ്ഥാനത്തെ വിവിധ ഭാഗങ്ങളില്‍ പ്രചാരണം ആരംഭിച്ചതെന്ന്, പാര്‍ട്ടിയുടെ മുന്‍ തലവന്‍ എം കരുണാനിധിയുടെ ജന്മസ്ഥലമായ തിരുവാരൂര്‍ ജില്ലയിലെ തിരുക്കുവലൈയില്‍ നടന്ന പരിപാടിയില്‍ സംസാരിക്കവെ ഉദയനിധി പറഞ്ഞിരുന്നു. പ്രഭാതം വിടരുന്നതിന് സ്റ്റാലിന്റെ ശബ്ദം എന്ന ബാനറില്‍ സംഘടിപ്പിക്കുന്ന പരിപാടി സംസ്ഥാനത്തെ 234 നിയമസഭാ മണ്ഡലങ്ങളിലും നടക്കും.

---- facebook comment plugin here -----

Latest