നെട്ടൂര്‍ ഫഹദ് കൊലക്കേസ്: യുവതി ഉള്‍പ്പെടെ രണ്ടുപേര്‍ കൂടി അറസ്റ്റില്‍

കൊച്ചി | എറണാകുളത്തെ നെട്ടൂരില്‍ വൈറ്റില മരട് സ്വദേശി ഫഹദിനെ (19) കുത്തിക്കൊലപ്പെടുത്തിയ സംഭവത്തില്‍ യുവതി ഉള്‍പ്പെടെ രണ്ട് പേര്‍ കൂടി അറസ്റ്റില്‍. വടകര സ്വദേശി അനില മാത്യു, മരട് സ്വദേശി എ എസ് അതുല്‍ എന്നിവരാണ് അറസ്റ്റിലായത്. ഫഹദിനെ കുത്താനുപയോഗിച്ച കത്തിയും കഞ്ചാവ് പൊതികളും അനിലയുടെ വാഹനത്തില്‍ നിന്ന് പോലീസ് കണ്ടെടുത്തു. കഞ്ചാവ് വില്‍പ്പന സംഘങ്ങള്‍ തമ്മിലുള്ള തര്‍ക്കമാണ് ഫഹദിന്റെ കൊലപാതകത്തില്‍ കലാശിച്ചത്. കേസില്‍ ഇതുവരെ 16 പേരാണ് അറസ്റ്റിലായത്. മുഖ്യ പ്രതികളായ പനങ്ങാട് സ്വദേശി ജയ്‌സണ്‍, ജോമോന്‍, നിതിന്‍ എന്നിവര്‍ ഉള്‍പ്പെടെ 14 പേരെ കഴിഞ്ഞ ദിവസങ്ങളില്‍ പോലീസ് പിടികൂടിയിരുന്നു.

ഈ മാസം 12നാണ് ഫഹദ് കൊല്ലപ്പെട്ടത്. കഞ്ചാവ് വില്‍പ്പന നടത്തിവന്ന ശ്രുതി എന്ന പെണ്‍കുട്ടിയെ പോലീസ് പിടികൂടിയതിനെ തുടര്‍ന്ന് പെണ്‍കുട്ടിയുടെ സംഘവും ഫഹദിന്റെ സംഘവും തമ്മിലുണ്ടായ തര്‍ക്കമാണ് കൊലപാതകത്തിലെത്തിയത്. തര്‍ക്കം തീര്‍ക്കുന്നതിനെന്ന് പറഞ്ഞ് ഫഹദിനെയും സംഘത്തെയും വിളിച്ചുവരുത്തിയ അനിലയുടെ സംഘം ഫഹദിനെ കൊലപ്പെടുത്തുകയായിരുന്നുവെന്നാണ് വിവരം. അനിലയുടെ ഫ്‌ളാറ്റില്‍ വച്ചാണ് കൊലപാതകം ആസൂത്രണം ചെയ്തതെന്ന് പോലീസ് കണ്ടെത്തിയിരുന്നു.