മുഖ്യമന്ത്രി കസേരയില്‍ കണ്ടവര്‍ കയറിയിരിക്കുന്ന കാലമല്ല ഇപ്പോള്‍: എം സ്വരാജ്

തിരുവനന്തപുരം |  സര്‍ക്കാറിനെതിരായ പ്രതിപക്ഷത്തിന്റെ അവിശ്വാസ പ്രമേയത്തിലെ പൊള്ളത്തരങ്ങല്‍ തുറന്നുകാട്ടിയും പ്രമേയം അവതരിപ്പിച്ച വി ഡി സതീശന്‍ അടക്കമുള്ളവരെ പരിഹസിച്ചും എം സ്വരാജ് എം എല്‍ എ. കേരളത്തില്‍ ഇടതുവിരുദ്ധ ദുഷ്ട സഖ്യം പ്രവര്‍ത്തിക്കുന്നുണ്ട്. യു ഡി എഫും ബി ജെ പിയും ചേര്‍ന്നുള്ളതാണ് ഈ നീക്കം. ഇവര്‍ നടത്തുന്ന അസത്യ ജല്‍പനങ്ങള്‍ അച്ചടിച്ച് വിട്ടും ദൃശ്യചാരുത നല്‍കിയും വിശുദ്ധ സത്യമാക്കാന്‍ ശ്രമിക്കുന്ന മാധ്യമങ്ങളും കൂടി ചേര്‍ന്നാണ് അവിശുദ്ധ സഖ്യമെന്നും സ്വരാജ് ആരോപിച്ചു. മുഖ്യമന്ത്രി കസേരയില്‍ കണ്ടവര്‍ കയറിയിരിക്കുന്ന പഴയ കാലമല്ല ഇപ്പോള്‍ കേരളത്തിലെന്ന് ഓര്‍ക്കണം.

കേരള നിയമസഭ അവിശ്വാസ പ്രമേയങ്ങള്‍ ഏറെ കണ്ടിട്ടുണ്ട്. നല്ല രീതിയില്‍ പ്രമേയം അവതരിപ്പിക്കാന്‍ പ്രാപ്തിയുണ്ടായിട്ടും വി ഡി സതീശന്റെ അവിശ്വാസ പ്രമേയം എന്തുകൊണ്ട് നനഞ്ഞ പടക്കം പോലെ ആയെന്ന് ആലോചിക്കണം. ഇത് പരാജയപ്പെട്ടു പോകുമെന്ന കാര്യത്തില്‍ സംശയമില്ല, പരാജയപ്പെടാന്‍ മാത്രമുള്ള വാദങ്ങള്‍ അവതരിപ്പിക്കുന്നതില്‍ പ്രതിപക്ഷത്തിന് നാണക്കേട് തോന്നേണ്ട കാര്യവുമില്ല. മഴപോലെ പെയ്തിറങ്ങുനന് നുണകളെ ജനങ്ങളുടെ മുന്നില്‍ തുറന്ന് കാണിക്കാനുള്ള വേദികൂടിയായാണ് അവിശ്വാസ പ്രമേയ ചര്‍ച്ചയെ ഇടത് പക്ഷം കാണുന്നതെന്നും എം സ്വരാജ് പറഞ്ഞു.

ഇടത് സര്‍ക്കാറിനെതിരെ നിയമസഭയില്‍ അവിശ്വാസ പ്രമേയം കൊണ്ട് വരുമ്പോള്‍ ഡല്‍ഹിയില്‍ മറ്റൊരു അവിശ്വാസം ചര്‍ച്ചയാകുകയാണ്. സോണിയ ഗാന്ധിക്കെതിരെ കോണ്‍ഗ്രസ് നേതാക്കള്‍ അവിശ്വാസ പ്രമേയം അവതരിപ്പിക്കുന്നു. അത് ചിലപ്പോള്‍ ജയിച്ചേക്കുമെന്നും എം സ്വരാജ് പറഞ്ഞു.

വെറും കൊള്ളയല്ല തീവെട്ടിക്കൊള്ളയാണെന്ന് മുന്‍ യു ഡി എഫ് കാലത്ത് നടന്നത് എന്ന് വിഡി സതീശന്‍ പറഞ്ഞിട്ടുണ്ട്. ആ വാക്ക് പിണറായി വിജയന്‍ സര്‍ക്കാറിനെതിരെ ഉപയോഗിക്കാത്തതില്‍ വിഡി സതീശനോട് നന്ദിയുണ്ടെന്നും എം സ്വരാജ് പറഞ്ഞു. ഭരണ തുടര്‍ച്ച ചര്‍ച്ച വന്നപ്പോള്‍ പ്രതിപക്ഷത്തിന് ഹാല്‍ ഇളകി. തുടര്‍ച്ചയായി അപമാനിതന്‍ ആകുന്നത് എന്തുകൊണ്ടെന്ന് പ്രതിപക്ഷ നേതാവ് ആലോചിക്കണം.

കേരളം മാഫിയാ രാജിലേക്ക് പോകുന്നു എന്ന മുന്‍ പ്രസ്താവന മുല്ലപ്പള്ളി രാമചന്ദ്രനും ഇത് വരെ ഇടത് സര്‍ക്കാറിനെതിരെ പ്രയോഗിച്ചിട്ടില്ലെന്നും എം സ്വരാജ് പറഞ്ഞു, ടൈറ്റാനിയം പാമോലിന്‍ അടക്കം അഴിമതിക്കേസുകള്‍ ഇപ്പോഴും നിലവിലുണ്ട്. കോടാനുകോടിയുടെ അഴിമതി കേസുകള്‍ ഇനിയും ഉണ്ട്. യു ഡി എഫ് നേതാക്കള്‍ ഘോഷയാത്രയായി ജയിലിലേക്ക് പോകുന്ന കാലം വിദൂരമല്ല. വഞ്ചക വലതുപക്ഷത്തെ പ്രബുദ്ധ കേരളം അധികാരത്തില്‍ നിന്ന് വലിച്ചെറിയുകയായിരുന്നു. ജനങ്ങളോടാണ് ഇടത് സര്‍ക്കാറിന്റെ പ്രതിബദ്ധത. കേരള ചരിത്രത്തിലെ കരുത്തനായ മുഖ്യമന്ത്രിയെ എന്തു ചെയ്യുമെന്നാണ് പ്രതിപക്ഷം ചെയ്യുമെന്നത്. പ്രാണനെടുക്കാന്‍ ശ്രമിച്ചിട്ടും നടക്കാത്തതിനാല്‍ മുഖ്യമന്ത്രിക്കെതിരെ ദുരാരോപണങ്ങള്‍ ഉയര്‍ത്തുകയാണെന്നും എം സ്വരാജ് ആക്ഷേപിച്ചു.

സ്വര്‍ണ്ണ കടത്തില്‍ പ്രതികളെ രക്ഷിക്കാന്‍ മുഖ്യമന്ത്രിയുടെ ഓഫീസില്‍ നിന്നും വിളിച്ചു എന്ന് പറഞ്ഞിട്ട് എന്തായി . സുനാമി പുനരധിവാസ പദ്ധതിയുടെ ഭാഗമായി വീടുകള്‍ വച്ചപ്പോള്‍ യു ഡി ഫ് കാലത്ത് സര്‍ക്കാറുമായി ധാരണ പത്രം ഒപ്പ് വെച്ചിരുന്നോ. ലൈഫ് പദ്ധതി തടയണം എന്നാണ് പ്രതിപക്ഷ ഉദ്ദേശം. പ്രതിപക്ഷ നടപടിയെ അധമം എന്ന് മാത്രമേ വിശേഷിപ്പിക്കാന്‍ ഉള്ളൂ. നാട് നശിക്കണം എന്നാണ് പ്രതിപക്ഷ ആഗ്രഹമെന്നും എം സ്വരാജ് ആരോപിച്ചു.