സ്‌കൂള്‍ പാഠ്യപദ്ധതി വെട്ടിച്ചുരുക്കേണ്ടതില്ല: കരിക്കുലം കമ്മിറ്റി

തിരുവനന്തപുരം | സംസ്ഥാനത്തെ സ്‌കൂള്‍ പാഠ്യപദ്ധതി വെട്ടിച്ചുരുക്കേണ്ട കാര്യമില്ലെന്ന് വ്യക്തമാക്കി കരിക്കുലം കമ്മിറ്റി. നിലവിലെ ഓണ്‍ലൈന്‍ പഠനം കൂടുതല്‍ കാര്യക്ഷമമായി തുടരാനും വിദ്യാഭ്യാസ മന്ത്രിയുടെ നേതൃത്വത്തില്‍ നടന്ന കരിക്കുലം കമ്മിറ്റി യോഗത്തില്‍ തീരുമാനമെടുത്തു. ഡിജിറ്റല്‍ പഠനം വിലയിരുത്താന്‍ എസ് സി ഇ ആര്‍ ടിയുടെ ഡയറക്ടറുടെ നേതൃത്വത്തില്‍ സമിതിയെ നിയോഗിക്കാനും യോഗം തീരുമാനിച്ചു.

സ്‌കൂള്‍ സിലബസ് വെട്ടിച്ചുരുക്കുന്നത് സാങ്കേതിക പ്രശ്നങ്ങള്‍ക്ക് ഇടയാക്കുമെന്നും കുട്ടികള്‍ക്ക് പഠനത്തില്‍ തുടര്‍ച്ച നഷ്ടപ്പെടുന്ന സാഹചര്യമുണ്ടാക്കുമെന്നും കരിക്കുലം കമ്മിറ്റി വിലയിരുത്തി. ഉന്നത പഠനത്തിന് പോകുന്ന വിദ്യാര്‍ഥികള്‍ക്കും ഇത് പ്രയാസങ്ങളുണ്ടാക്കും. ഈ സാഹചര്യമുണ്ടാകാതിരിക്കാന്‍ പരമാവധി ഓണ്‍ലൈന്‍ ക്ലാസുകള്‍ സംഘടിപ്പിക്കുകയാണ് വേണ്ടതെന്നും കമ്മിറ്റി വിലയിരുത്തി.