കാബൂളില്‍ ചാവേര്‍ ആക്രമണം നടത്തിയത് മലയാളിയല്ലെന്ന് ഡി എന്‍ എ പരിശോധന ഫലം

ന്യൂഡല്‍ഹി | അഫ്ഗാനിസ്ഥാന്‍ തലസ്ഥാനമായ കാബൂളില്‍ മാര്‍ച്ച് 25ന് ഒരു ഗുരുദ്വാരയിലുണ്ടായ ചാവേര്‍ ആക്രമണത്തില്‍ പങ്കെടുത്തവരില്‍ ഇന്ത്യക്കാരുണ്ടെന്ന റിപ്പോര്‍ട്ട് തെറ്റ്. ആക്രമണത്തില്‍ പങ്കെടുത്ത മൂന്ന് പേരില്‍ ഒരാള്‍ കാസര്‍കോട് സ്വദേശിയായ കല്ലുകെട്ടി ഇജാസാണെന്ന് നേരത്തെ ദേശീയ മാധ്യമങ്ങള്‍ റിപ്പോര്‍ട്ട് ചെയ്തിരുന്നു. എന്നാല്‍ ചാവേറായ വ്യക്തിയുടെ ഡി എന്‍ എ അഫ്ഗാന്‍ സുരക്ഷാ ഉദ്യോഗസ്ഥര്‍ പരിശോധധിച്ചതില്‍ ഇത് തെറ്റാണെന്ന് തെളിഞ്ഞിതായി ദ പ്രിന്റ് റിപ്പോര്‍ട്ട് ചെയ്തു. പരിശോധനയില്‍ 21കാരനായ മുഹമ്മദ് മുഹ്സിന്‍ എന്ന അബു ഖാലിദ് അല്‍ഹിന്ദിയെന്ന അഫ്ഗാന്‍ പൗരനാണ് ഇതെന്നും ഇന്ത്യക്കാരനല്ലെന്ന് തെളിയുകയുമായിരുന്നു. ആക്രമണതതില്‍ ഇന്ത്യക്കാരില്ലെന്ന റിപ്പോര്‍ട്ട് എന്‍ ഐ എക്ക് കൈമാറിയതായി സുരക്ഷാ ഉദ്യോഗസ്ഥരുമായി ബന്ധപ്പെട്ട വൃത്തങ്ങള്‍ പറഞ്ഞതായി പ്രിന്റ് പറയുന്നു.