കൊവിഡ്: പുതുച്ചേരിയില്‍ നിയന്ത്രണങ്ങള്‍ കര്‍ശനമാക്കി; കടകള്‍ രണ്ട് മണി വരെ മാത്രം

മാഹി | മാഹി ഉൾക്കൊള്ളുന്ന കേന്ദ്ര ഭരണപ്രദേശമായ പുതുച്ചേരിയില്‍ കൊറോണ വൈറസ് വ്യാപനം തടയാന്‍ നിയന്ത്രണങ്ങള്‍ കര്‍ശനമാക്കാന്‍ തിരുമാനം. ചൊവ്വാഴ്ച മുതല്‍ 10 ദിവസത്തേക്ക് പുതുച്ചേരിയിലെ കടകള്‍ രാവിലെ 6 മുതല്‍ ഉച്ചക്ക് 2 വരെ മാത്രമേ തുറക്കാന്‍ പാടുള്ളൂവെന്ന് മുഖ്യമന്ത്രി നാരായണസാമി അറിയിച്ചു. മന്ത്രിമാരുമായും ദുരന്തനിവാരണ സംഘങ്ങളുമായും നിരവധി തവണ നടത്തിയ കൂടിക്കാഴ്ചയെത്തുടര്‍ന്നാണ് തീരുമാനം.

മദ്യവില്‍പ്പന ശാലകളും ഉച്ചയ്ക്ക് രണ്ട് മണി വരെ മാത്രമേ തുറക്കൂ. ബീച്ച് റോഡ് അടച്ചു. ഹോട്ടലുകള്‍ക്ക് ഉച്ചക്ക് 2 മണി വരെ ഭക്ഷണം വിളമ്പാനും രാത്രി 8 മണി വരെ പാര്‍സല്‍ നല്‍കുവാനും അനുവാദമുണ്ട്. അത്യാവശ്യ കാരണങ്ങള്‍ക്ക് അല്ലാതെ ഉച്ചകഴിഞ്ഞ് 3 മണിക്ക് ശേഷം പുറത്തേക്ക് ഇറങ്ങുന്നത് കണ്ടാല്‍ 200 രൂപ പിഴ ഈടാക്കുമെന്നും മുഖ്യമന്ത്രി വ്യക്തമാക്കി.

പുതുച്ചേരിയില്‍ ഇതുവരെ 366 പേര്‍ക്കാണ് രോഗം സ്ഥിരീകരിച്ചത്. ഇതില്‍ എട്ട് പേര്‍ മരിച്ചു. 140 പേര്‍ക്ക് രോഗം ഭേദമായി. 218 പേര്‍ നിലവില്‍ ചികിത്സയിലുണ്ട്.