മോദി സ്വേച്ഛാധിപതിയും ദീര്‍ഘവീക്ഷണമില്ലാത്ത നേതാവും; തരുണ്‍ ഗൊഗോയ്

ഗുവാഹത്തി |  യാതൊരു മുന്നൊരുക്കങ്ങളുമില്ലാതെ, ഇന്ത്യയിലെ സംസ്ഥാനങ്ങളെ പരിഗണിക്കാതെ പ്രധാനമന്ത്രി നരേന്ദ്രമോദി ഒറ്റയടിക്ക് ലോക്ക് ഡൗണ്‍ നീട്ടിയത് ഗുരുതര വീഴ്ചയെന്ന് അസം മുന്‍ മുഖ്യമന്ത്രിയും മുതിര്‍ന്ന കോണ്‍ഗ്രസ് നേതാവുമായ തരുണ്‍ ഗൊഗോയി. അദ്ദേഹത്തിന്റെ വിചാരം അദ്ദേഹത്തിന് എല്ലാമറിയാമെന്നാണ്. അദ്ദേഹം ഒരു കാര്യവും ആരുമായും ചേര്‍ന്ന് സംസാരിക്കില്ല. ഇത് ഒരു സ്വേച്ഛാധിപതിയുടെ രീതിയാണ്.

ആസൂത്രണമില്ലാതെ ലോക്ക് ഡൗണ്‍ പ്രഖ്യാപിച്ചതും പിന്നീട് നീട്ടിയതും രാജ്യത്തെ സാമ്പത്തിക സ്ഥിതിയെയും നിരവധി വരുന്ന കുടിയേറ്റ തൊഴിലാളികളെയും സാരമായി ബാധിച്ചു. യാതൊരു മുന്നൊരുക്കങ്ങളുമില്ലാതെ ലോക്ക് ഡൗണ്‍ പ്രഖ്യാപിച്ചതിലൂടെ അദ്ദേഹം ഒരു ദീര്‍ഘവീക്ഷണമില്ലാത്ത നേതാവാണെന്ന് വ്യക്തമായിരിക്കുകയാണെന്നും ഗൊഗോയ് പറഞ്ഞു. ഇന്ത്യ ടുഡേ ടിവിക്ക് അനുവദിച്ച അഭിമുഖത്തിലാണ് വിമര്‍ശനം.

മോദി ആദ്യം ചെയ്ത വിഡ്ഢിത്തം നോട്ട് നിരോധനമായിരുന്നു. രണ്ടാമത്തേത് ജി എസ് ടി നടപ്പാക്കിയത്. കൃത്യമായ ആസൂത്രണങ്ങളോ പദ്ധതികളോ നടപ്പാക്കാതെ കുറച്ച് മണിക്കൂറുകള്‍ കൊണ്ട് ലോക്ക് ഡൗണ്‍ പ്രഖ്യാപിച്ചതാണ് മോദി ചെയ്ത മൂന്നാമത്തെ വലിയ തെറ്റെന്നും തരുണ്‍ ഗൊഗോയി പറഞ്ഞു. മോദി സര്‍ക്കാര്‍ 20 ലക്ഷം കോടിയുടെ സാമ്പത്തിക പാക്കേജ് പ്രഖ്യാപിച്ചിട്ടും കുടിയേറ്റ തൊഴിലാളികള്‍ക്ക് യാതൊരു ആനുകൂല്യങ്ങളും ലഭിച്ചില്ലെന്നും കുറ്റപ്പെടുത്തി.