മദ്യം തൊണ്ടയിലെ കൊറോണയെ നശിപ്പിക്കും; ഷാപ്പുകള്‍ തുറക്കണം: കോണ്‍ഗ്രസ് എംഎല്‍എ

ജയ്പുര്‍ | മദ്യം തൊണ്ടയില്‍ നിന്ന് കൊറോണ വൈറസിനെ നശിപ്പിക്കാന്‍ സഹായിക്കുമെന്ന് രാജസ്ഥാനിലെ കോണ്‍ഗ്രസ് എംഎല്‍എ ഭരത് സിംഗ് കുന്ദന്‍പൂര്‍. അതിനാല്‍ മദ്യഷാപ്പുകള്‍ തുറക്കാന്‍ നടപടി സ്വീകരിക്കണമെന്ന് ആവശ്യപ്പെട്ട് അദ്ദേഹം മുഖ്യമന്ത്രി അശോക് ഗെഹ്‌ലോട്ടിന് കത്തെഴുതി.

മദ്യം ഉപയോഗിച്ച് കൈ കഴുകുമ്പോള്‍ കൊറോണ നശിക്കുന്നത് പോലെ അത് കുടിച്ചാല്‍ തൊണ്ടയിലെ അണുബാധ ഇല്ലാതാകുമെന്നാണ് ഭരത് സിംഗിന്റെ കണ്ടെത്തല്‍. വ്യാജമദ്യം കുടിച്ച് ജനങ്ങളുടെ ജീവന്‍ അപകടത്തിലാണെന്നും അതിനാല്‍ മദ്യഷാപ്പുകള്‍ തുറക്കുന്നതാണ് ബുദ്ധിയെന്നും അദ്ദേഹം കത്തില്‍ പറയുന്നു.

ലോക്ഡൗണ്‍ കാരണം സംസ്ഥാന സര്‍ക്കാര്‍ കടുത്ത സാമ്പത്തിക പ്രതിസന്ധിയിലായിരിക്കെ, അനധികൃത മദ്യവില്‍പനക്കാര്‍ നേട്ടമുണ്ടാക്കുകയാണെന്നും ഭരത് സിംഗ് പറഞ്ഞു. സാങ്കോഡില്‍ നിന്നുള്ള കോണ്‍ഗ്രസ് എംഎല്‍എയാണ് ഭരത് സിങ് കുന്ദന്‍പുര്‍.