ആറ് വയസുകാരിയെ കാണാതായിട്ട് മണിക്കൂറുകള്‍; നാടെങ്ങും തിരച്ചില്‍

കൊല്ലം | വീട്ടുമുറ്റത്തെ കളിച്ച് കൊണ്ടിരിക്കെ ഇന്ന് രാവിലെ 10.15 മുതല്‍ കാണാതായ ആറ് വയസുകാരിയെ ഇനിയും കണ്ടെത്താനായില്ല. പോലീസും ഡോക് സ്‌ക്വാഡും നാട്ടുകാരുമെല്ലാം ചേര്‍ന്നുള്ള തിരച്ചില്‍ രാത്രിയിലും തുടരുകയാണ്. കൊല്ലം നെടുമണ്‍കാവ് ഇളവൂരില്‍ പ്രദീപ്- ധന്യ ദമ്പതികളുടെ മകള്‍ ദേവനന്ദയെയാണ് വീട്ട്മുറ്റത്ത് നിന്ന് കാണാതായാത്. കുട്ടിയുടെ മാതാവ് ധന്യ മാത്രമായിരുന്നു സംഭവ സമയം വീട്ടിലുണ്ടായിരുന്നത്. ധന്യ വീടിന് പുറകില്‍ തുണി അലക്കിയിടുകയാണ്. ഈ സമയം വീടിന് മുന്നില്‍ കളിച്ചുകൊണ്ടിരിക്കുകയായിരുന്നു ദേവനന്ദ. എന്നാല്‍ ഏറെ സമയം കഴിഞ്ഞിട്ടും കുട്ടിയുടെ ശബ്ദം കേള്‍ക്കാതായതിനെ തുടര്‍ന്ന് ധന്യ എത്തിനോക്കിയപ്പോഴാണ് മകളെ കാണാതായതായി അറിയുന്നത്. ഉടന്‍ തന്നെ വീട്ട് പരിസരത്തും മറ്റു തിരഞ്ഞെങ്കിലും കണ്ടെത്തിയില്ല. ഇതോടെയാണ് ധന്യ ബഹളംവെച്ച് നാട്ടുകാരെ വിവരമറിയിക്കുകയായിരുന്നു.

കുട്ടിയെ കാണാനില്ലെന്ന വിവരമറിഞ്ഞതോടെ പോലീസും നാട്ടുകാരും പ്രദേശത്ത് വിശദമായ അന്വേഷണം നടത്തി. വീടിന്റെ നൂറുമീറ്റര്‍ അകലെ പുഴയുള്ളതിനാല്‍ കുട്ടി പുഴയില്‍ വീണിരിക്കാമെന്ന സംശയത്തെ തുടര്‍ന്ന് ഇവിടെയും തിരച്ചില്‍ നടത്തി. പുഴയിലെ തിരച്ചിലിനായി അഗ്‌നിരക്ഷാ സേനയെ വരുത്തിച്ചു. ഇതിനിടെ പോലീസും ഡോഗ് സ്‌ക്വാഡുമെല്ലാം സ്ഥലത്തെത്തി തിരച്ചിലില്‍ പങ്കാളികളായി. പ്രദീപിന്റെ വീട്ടില്‍നിന്ന് മണംപിടിച്ച പോലീസ് നായ പുഴയുടെ കുറുകെയുള്ള ബണ്ട് കടന്ന് വള്ളക്കടവ് വരെ ഓടി തിരിച്ചുമടങ്ങി. ഈ ഭാഗത്തും പോലീസ് വിശദമായ തിരച്ചില്‍ നടത്തിയെങ്കിലും ഫലമുണ്ടായില്ല.

അതിനിടെ കുട്ടിയെ കിട്ടിയതായി സാമൂഹികമാധ്യമങ്ങളില്‍ വ്യാജ വാര്‍ത്തകള്‍ പ്രചരിച്ചത് പോലീസിനെ ആശയക്കുഴപ്പത്തിലാക്കി. നിരവധി പേര്‍ പങ്കുവെച്ച ഈ വ്യാജ വാര്‍ത്ത പ്രചരിപ്പിച്ചവര്‍ക്കെതിരെ നടപടി സ്വീകരിക്കുമെന്ന് പോലീസ് അറിയിച്ചു.