'ദേശവിരുദ്ധര്‍ക്ക് ബിരിയാണിയല്ല, വെടിയുണ്ടകളാണ് നല്‍കേണ്ടത്'; കേന്ദ്ര മന്ത്രിയെ പിന്തുണച്ച് കര്‍ണാടക മന്ത്രി

ബെംഗളൂരു |രാജ്യ വിരുദ്ധരരെ വെടിവെച്ചിടണമെന്ന കേന്ദ്രമന്ത്രി അനുരാഗ് ഠാക്കൂറിന്റെ വിവാദ പ്രസ്താവനയെ പിന്തുണച്ച് കര്‍ണാടക മന്ത്രി. “ദേശവിരുദ്ധര്‍ക്ക് ബിരിയാണിയല്ല മറിച്ച് വെടിയുണ്ടകളാണ് നല്‍കേണ്ടതെന്ന് ഠാക്കൂറിനെ പിന്തുണച്ച്‌ക്കൊണ്ട് കര്‍ണാടക ടൂറിസം മന്ത്രി സി ടി രവി ട്വിറ്ററില്‍ കുറിച്ചു.

ദേശവിരുദ്ധര്‍ക്കെതിരേ കേന്ദ്രമന്ത്രി അനുരാഗ് ഠാക്കൂര്‍ നടത്തിയ പരാമര്‍ശത്തില്‍ അദ്ദേഹത്തെ വിമര്‍ശിക്കുന്നവര്‍ ഭീകരവാദികളായ അജ്മല്‍ കസബിന്റെയും യാക്കൂബ് മേമന്റെയും വധത്തെ എതിര്‍ത്തവരും പൗരത്വ ഭേദഗതി നിയമത്തെ കുറിച്ച് ദുഷ്പ്രചാരണം നടത്തുന്ന ടുക്‌ഡെ ടുക്‌ഡെ സംഘത്തിലുള്ളവരാണെന്നും സി ടി രവി ട്വീറ്റില്‍ കൂട്ടിച്ചേര്‍ത്തു.

കഴിഞ്ഞ ദിവസം ഡല്‍ഹിയില്‍ നടന്ന തിരഞ്ഞെടുപ്പ് റാലിയിലാണ് പ്രക്ഷോഭം നടത്തുന്നവരെ വെടിവെച്ച് കൊല്ലണമെന്ന വിവാദ പരാമര്‍ശം അനുരാഗ് ഠാക്കൂര്‍ നടത്തിയത്.ഇതേസംബന്ധിച്ച് തിരഞ്ഞെടുപ്പ് കമ്മീഷന്‍ അദ്ദേഹത്തോട് വിശദീകരണം ആവശ്യപ്പെട്ടിട്ടുണ്ട്.

തിരഞ്ഞെടുപ്പ് പെരുമാറ്റ ചട്ടം ലംഘിച്ചതിനെ തുടര്‍ന്ന് ബിജെപി സ്ഥാനാര്‍ഥി കൂടിയായ കപില്‍ മിശ്രയെ പ്രചാരണങ്ങളില്‍ നിന്ന് കമ്മീഷന്‍ നേരത്തെ വിലക്കിയിരുന്നു