Kerala
സെമി ഹൈസ്പീഡ് റെയില്: ഭൂമി ഏറ്റെടുക്കല് നടപടികള് ആരംഭിക്കാന് തീരുമാനം
തിരുവനന്തപുരം | നാല് മണിക്കൂര്കൊണ്ട് തിരുവനന്തപുരത്ത് നിന്നും കാസര്കോട് എത്തുന്ന സെമി ഹൈസ്പീഡ് റെയില് ലൈനിന് ഭൂമി ഏറ്റെടുക്കല് നടപടികള് ആരംഭിക്കാന് തീരുമാനം. മുഖ്യമന്ത്രി പിണറായി വിജയന്റെ നേതൃത്വത്തില് നടന്ന ഉന്നത യോഗത്തിലാണ് തീരുമാനം. ഭൂമി ഏറ്റെടുക്കല് വേഗത്തിലാക്കാന് ഉടന് ലാന്ഡ് അക്വസിഷന് സെല്ലുകള് ആരംഭിക്കും. റെയില്വേ മന്ത്രാലയം പദ്ധതിക്ക് അംഗീകാരം നല്കിയ സാഹചര്യത്തിലാണ് സര്ക്കാര് നടപടികളിലേക്ക് കടക്കുന്നത്.
സാധ്യതാ റിപ്പോര്ട്ട് പ്രകാരം 1226 ഹെക്ടര് ഭൂമിയാണ് ഏറ്റെടുക്കേണ്ടത്. എന്നാല്, നിലവിലുള്ള റെയില്വേ ലൈനിന് സമാന്തരമായി പുതിയ പാത പോകുന്ന ഭാഗത്ത് റെയില്വേക്കുള്ള അധിക ഭൂമി ഈ പദ്ധതിക്ക് ഉപയോഗിക്കാമെന്ന് റെയില്വേ മന്ത്രാലയം സമ്മതിച്ചിട്ടുണ്ട്. ഇത്തരത്തില് 200 ഹെക്ടര് ഭൂമി ഈ നിലയില് ലഭിക്കും. ബാക്കി ഏറ്റെടുത്താല് മതി. 66,000 കോടി രൂപയാണ് പദ്ധതിക്കായി ചെലവ് പ്രതീക്ഷിക്കുന്നത്.
റെയില്വേ മന്ത്രാലയത്തിനും സംസ്ഥാന സര്ക്കാറിനും തുല്ല്യ പങ്കാളിത്തം എന്ന നിലയിലാണ് പദ്ധതി നടപ്പാക്കുക. അന്താരാഷ്ട്ര ധനകാര്യ ഏജന്സികളില് നിന്ന് വായ്പയെടുത്താണ് പദ്ധതി നടപ്പാക്കുക. ജര്മ്മന് ബേങ്ക്, ഏഷ്യന് ഇന്ഫ്രാസ്ട്രക്ചര് ഇന്വെസ്റ്റ്മെന്റ് ബേങ്ക്, ജപ്പാന് ഇന്റര്നാഷണല് കോഓപ്പറേഷന് ഏജന്സി (ജൈക്ക) എന്നിവയുമായി വായ്പ സംബന്ധിച്ച് ചര്ച്ച നടക്കുകയാണ്.
നിര്ദിഷ്ട സെമി ഹൈസ്പീഡ് റെയിലിലൂടെ ഓടുന്ന വണ്ടികളുടെ വേഗം 200 കി.മീറ്റര് എന്നത് റെയില്വേ മന്ത്രാലയം അംഗീകരിച്ചിട്ടുണ്ട്. അതനുസരിച്ച് തിരുവനന്തപുരത്തു നിന്ന് ഒന്നര മണിക്കൂര് കൊണ്ട് കൊച്ചിയിലും നാലു മണിക്കൂര്കൊണ്ട് കാസര്കോട്ടും എത്താന് കഴിയും. 532 കി.മീറ്ററാണ് പാതയുടെ മൊത്തം നീളം. പാതയുടെ ആകാശ സര്വെയും ട്രാഫിക് സര്വെയും പൂര്ത്തിയായി. 2020 മാര്ച്ചില് അലൈന്മെന്റിന് അവസാന രൂപമാകും. ഈ വര്ഷം തന്നെ നിര്മാണം ആരംഭിക്കാനും 2024 ല് പൂര്ത്തിയാക്കാനുമാണ് ലക്ഷ്യം.