കേരളത്തിലെ ഏറ്റവും ഉയരം കൂടിയ പാലം ഇനി കാസർകോട്ട്

കാസർകോട് |പുല്ലുർ–പെരിയ– ബേഡഡുക്ക പഞ്ചായത്തുകളുമായി ബന്ധിപ്പിക്കുന്ന ആയംകടവ് പാലം നാളെ യാത്രക്കാർക്കായി മുഖ്യമന്ത്രി പിണറായി വിജയൻ തുറന്നു കൊടുക്കും. കേരളത്തെിലതന്നെ ഏറ്റവും ഉയരം കൂടിയ പാലമായ കാസർകോട് ആയംകടവ് പാലം യഥാർത്ഥ്യമായി. പെർലടുക്കം-ആയംകടവ്-പെരിയ റോഡിൽ പയസ്വിനിപ്പുഴയ്ക്ക് കുറുകെയാണ് പാലം നിർമ്മിച്ചത്. 24 മീറ്റർ ഉയരത്തിലും 150 മീറ്റർ നീളത്തിൽ നിർമ്മിച്ച പാലത്തിന്റേയും 3.8 കിലോമീറ്റർ മെക്കാഡം ചെയ്ത അപ്രോച്ച് റോഡിന്റെയും പ്രവൃത്തിയാണ് ഇതിനോടകം പൂർത്തിയായത്.

2015 ഒക്ടോബർ 1നാണ്  പാലത്തിന്റെ നിർമാണ പ്രവൃത്തിക്കുള്ള സാങ്കേതികാനുമതി നൽകിയത്. 2016 ജനുവരിയിൽ അന്നത്തെ പൊതുമരാമത്ത്  മന്ത്രി ഇബ്രാഹിം കുഞ്ഞാണ് പാലത്തിന്റെ ശിലാസ്ഥാപനം നടത്തിയത്. ആദ്യ ഡിസൈനിലെ അപാകത കാരണം പാലത്തിന്റെ നിർമാണ പ്രവൃത്തി തടസ്സപ്പെട്ടുവെങ്കിലും പിന്നീട് എൻ ഐ ടിയിലെ വിദഗ്ദനായ ഡോ. അരവിന്ദാക്ഷന്റെ സഹായം തേടുകയായിരുന്നു.

കാസർകോട് വികസനപാക്കേജിൽ ഉൾപ്പെടുത്തി 14 കോടി രൂപ ചിലവിൽ യാഥാർത്ഥ്യമാക്കുന്ന പദ്ധതിക്ക് ടൂറിസം മേഖലയിൽ സമഗ്ര സംഭാവന നൽകാൻ സാധിക്കും. കർണ്ണാടകയിലെ മടിക്കേരി, സുള്ള്യ, സുബ്രഹ്മണ്യ എന്നീ സ്ഥലങ്ങളിൽ നിന്നും ബേക്കലിൽ എത്തിച്ചേരാൻ എളുപ്പമുള്ള പാതയാകും ഇത്. പാലം യാഥാർത്ഥ്യമാകുന്നതോടെ ജില്ലയിലെ ദേലമ്പാടി, കാറഡുക്ക, മുളിയാർ, ബള്ളൂർ പഞ്ചായത്തുകളിലെ ജനങ്ങൾക്ക് പെരിയ സെൻട്രൽ യൂണിവേഴ്‌സിറ്റിയിലേക്കും, കാഞ്ഞങ്ങാട് നഗരത്തിലേക്കും എത്തിച്ചേരാനുള്ള എളുപ്പ മാർഗ്ഗമാകും.