അല്‍ ഖുദ്‌റ- ലെഹ്ബാബ് ഇന്റര്‍സെക്ഷന്‍; 65 ശതമാനം പൂര്‍ത്തിയായി

ദുബൈ: അല്‍ ഖുദ്‌റ-ലെഹ്ബാബ് ഇന്റര്‍സെക്ഷന്‍ പദ്ധതിയുടെ നിര്‍മാണ പ്രവര്‍ത്തനങ്ങള്‍ 65 ശതമാനം പൂര്‍ത്തിയായതായി റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി (ആര്‍ ടി എ) ഡയറക്ടര്‍ ജനറലും ബോര്‍ഡ് ചെയര്‍മാനുമായ മതര്‍ അല്‍ തായര്‍ അറിയിച്ചു. റോഡുകള്‍ വിഭജിച്ചു എല്ലാ ദിശകളിലേക്കും ഗതാഗതം സാധ്യമാക്കുന്ന ഫ്‌ളൈ ഓവറിലേക്ക് ജംഗ്ഷനെ നവീകരിച്ചു കൊണ്ടിരിക്കുന്നു.

എക്സ്പോ റോഡ്, ജാഫ്സ, അബുദാബി എന്നിവിടങ്ങളിലേക്കും തിരിച്ചും ബദല്‍ ലിങ്ക് വാഗ്ദാനം ചെയ്യുന്ന ഒരു പ്രധാന ട്രാഫിക് ഇടനാഴിയാണ് ലെഹ്ബാബ് റോഡ്. കൂടാതെ ഡൗണ്‍ ടൗണിലൂടെ പോകാതെ തന്നെ സാധ്യമാക്കും. പാലങ്ങളില്‍ 70 ശതമാനവും സൈക്ലിംഗ് പാലത്തില്‍ 90 ശതമാനവും പൂര്‍ത്തീകരിച്ചു. ഈ വര്‍ഷം അവസാനത്തോടെ പദ്ധതി പൂര്‍ത്തീകരിക്കാന്‍ ഒരുങ്ങുന്നു.
രണ്ട് പാലങ്ങള്‍ വലത്, ഇടത്, യു-ടേണുകള്‍ സേവിക്കുന്നതിനുള്ള റാമ്പുകള്‍ എന്നിവ പദ്ധതിയില്‍ ഉള്‍പ്പെടുന്നു. തെരുവ് വീതികൂട്ടല്‍, ലൈറ്റിംഗ് ജോലികള്‍, മഴവെള്ള ഡ്രെയിനേജ് സംവിധാനങ്ങള്‍, യൂട്ടിലിറ്റി ലൈനുകള്‍ എന്നിവക്ക് പുറമേ സൈക്ലിംഗ് ബ്രിഡ്ജും പദ്ധതിയില്‍ ഉള്‍പ്പെടുന്നു.

അല്‍ ഖുദ്‌റ റോഡിന്റെ വീതികൂട്ടല്‍ ജുമൈറ മുതല്‍ ഉമ്മു സുഖീം സ്ട്രീറ്റ് വരെ നടക്കും. ഓരോ ദിശയിലും മൂന്ന് പാതകളുള്ള രണ്ട് പാലങ്ങള്‍ നിര്‍മിക്കും. ആദ്യത്തെ പാലം ഈസ്റ്റേണ്‍ പാരലല്‍ റോഡിലാണ് (അല്‍ അസയല്‍ സ്ട്രീറ്റ്), രണ്ടാമത്തേത് വെസ്റ്റേണ്‍ പാരലല്‍ റോഡിന് (ആദ്യത്തെ അല്‍ ഖൈല്‍ റോഡ്) കുറുകെയും ഇവ അല്‍ ഖൈല്‍ റോഡിന്റെ ഫ്‌ളൈ ഓവറിലും അറേബ്യന്‍ റാഞ്ചുകളുടെ ഇന്റര്‍ചേഞ്ചിലും സുഗമമായ ഗതാഗതം സാധ്യമാക്കും. അല്‍ ഖുദ്‌റ റോഡിലേക്കും അല്‍ ഖുദ്‌റ ബ്രിഡ്ജിലേക്കും എമിറേറ്റ്‌സ് റോഡിന് കുറുകെ സീഹ് അസ്സലം വരെയുള്ള ഗതാഗതവും സുഗമമാവും.

ലെഹ്ബാബ് കവലയില്‍ നിന്ന് ബാബ് അല്‍ ഷംസ് വരെ 12 കിലോമീറ്റര്‍ ദൂരത്തില്‍ ഓരോ ദിശയിലും ഒന്ന് മുതല്‍ മൂന്ന് വരെ പാതകളിലേക്ക് റോഡ് വീതികൂട്ടുന്നുണ്ട്. നിരവധി ഘട്ടങ്ങളില്‍ അല്‍ ഖുദ്‌റ റോഡിന്റെ മെച്ചപ്പെടുത്തലുകള്‍ ആര്‍ ടി എ ഏറ്റെടുത്തിട്ടുണ്ട്. റോഡ് മെച്ചപ്പെടുത്തലുകള്‍ രണ്ട് പാലങ്ങള്‍ ഓരോ ദിശയിലും മൂന്ന് പാതകളായി വീതികൂട്ടുകയും വാഹനങ്ങള്‍ക്കും ഒട്ടകങ്ങള്‍ക്കും ക്രോസിംഗുകള്‍ നിര്‍മിക്കുകയും ചെയ്തു. 18 കിലോമീറ്റര്‍ സൈക്ലിംഗ് ട്രാക്ക്, വിശ്രമ കേന്ദ്രം, ബൈക്ക് വാടകക്കെടുക്കലിനും ആക്സസറികള്‍ക്കുമുള്ള ഷോപ്പുകള്‍, പൂര്‍ണസജ്ജമായ ക്ലിനിക്, സൈക്ലിംഗ് ഗേറ്റ്, റെസ്റ്റ് ഏരിയ, 10 ഷേഡുള്ള ഏരിയകള്‍, ബൈക്ക് റാക്കുകള്‍ എന്നിവയും ഉള്‍ക്കൊള്ളുന്ന പദ്ധതികളുണ്ട്.

ലെഹാബ് പോലീസ് സ്റ്റേഷന്‍ മുതല്‍ ശൈഖ് സായിദ് റോഡ് വരെ 55 കിലോമീറ്റര്‍ നീളമുള്ള സെക്ടറിലൂടെ ലെഹ്ബാബ്, എക്‌സ്‌പോ റോഡുകള്‍ മെച്ചപ്പെടുത്തുന്നതിനു കീഴില്‍ 10 പദ്ധതികള്‍ ആര്‍ ടി എ പൂര്‍ത്തിയാക്കി.
ഓരോ ദിശയിലും രണ്ട് മുതല്‍ നാല് വരെ പാതകള്‍ വീതികൂട്ടുക, 24 പാലങ്ങള്‍ ഉള്‍ക്കൊള്ളുന്ന ശൈഖ് സായിദ് റോഡിന്റെ എട്ടാമത്തെ ഇന്റര്‍ചേഞ്ചില്‍ ഒരു ഫ്‌ളൈ ഓവര്‍ നിര്‍മാണം എന്നിവയാണ് ശേഷിക്കുന്നതെന്ന് അല്‍ തായര്‍ പറഞ്ഞു.