വയനാട് എൻജിനീയറിംഗ് കോളജിൽ വിദ്യാർഥി സംഘർഷം; അഞ്ച് പേർക്ക് പരുക്ക്

മാനന്തവാടി | വയനാട് തലപ്പുഴ എൻജിനീയറിംഗ് കോളജിൽ എസ് എഫ് ഐ- യു ഡി എസ് എഫ് സംഘർഷത്തിൽ അഞ്ച് വിദ്യാർഥികൾക്ക് പരുക്കേറ്റു. യു ഡി എസ് എഫ് പ്രവർത്തകനായ രണ്ടാം വർഷ ഇലക്ട്രോണിക്‌സ് വിദ്യാർഥിയും തലശ്ശേരി പാലോട് സ്വദേശിയുമായ അദിൻ അബ്ദുല്ലയുടെ (20) മൂക്കിന് സാരമായി പരുക്കേറ്റു. പോലീസ് എത്തി സ്ഥിതി നിയന്ത്രണ വിധേയമാക്കുകയായിരുന്നു. പരുക്കേറ്റവരെ ആശുപത്രിയിൽ പ്രവേശിപ്പിച്ചു.

കഴിഞ്ഞ ദിവസം എസ് എഫ് ഐ കോളജിൽ നടത്തിയ പരിപാടിയിൽ പുറമെ നിന്നുള്ള ഡി വൈ എഫ് ഐ പ്രവർത്തകരെത്തുകയും ഹോസ്റ്റലിൽ താമസിക്കുന്ന യു ഡി എസ് എഫ് പ്രവർത്തകരെ ഭീഷണിപ്പെടുത്തുകയും ചെയ്തതായി ആരോപണമുയർന്നിരുന്നു. ഇത് ചോദ്യം ചെയ്യുന്നതിനിടെ യാതൊരുവിധ പ്രകോപനവും ഇല്ലാതെ എസ് എഫ് ഐ പ്രവർത്തകർ ആക്രമിക്കുകയായിരുന്നെന്ന് യു ഡി എസ് എഫ് ആരോപിക്കുന്നു.