ബാഗില്‍ ഒരു രൂപ ഉണ്ടായിരുന്നുവെന്ന് തെളിയിച്ചാല്‍ പ്രചാരണ പ്രവര്‍ത്തനം നിര്‍ത്തും; വെല്ലുവിളിയുമായി രാഹുല്‍ മാങ്കൂട്ടത്തില്‍

പാലക്കാട് | ഹോട്ടലിലേക്ക് ട്രോളി ബാഗില്‍ പണം കൊണ്ടുവന്നുവെന്ന ആരോപണം മാധ്യമങ്ങള്‍ക്കു മുമ്പാകെ നിഷേധിച്ച് പാലക്കാട്ടെ യു ഡി എഫ് സ്ഥാനാര്‍ഥി രാഹുല്‍ മാങ്കൂട്ടത്തില്‍. ട്രോളി ബാഗില്‍ കൊണ്ടുവന്നത് തന്റെ വസ്ത്രങ്ങളാണ്. ബാഗില്‍ ഉണ്ടായിരുന്നത് പണമാണെന്ന ആരോപണം തെളിയിക്കാന്‍ രാഹുല്‍ വെല്ലുവിളിച്ചു.

ട്രോളി ബാഗില്‍ ഒരു രൂപ ഉണ്ടായിരുന്നുവെന്ന് തെളിയിച്ചാല്‍ പാലക്കാട്ടെ തന്റെ പ്രചാരണം നിര്‍ത്തും. നീല ട്രോളി ബാഗ് രാഹുല്‍ വാര്‍ത്താ സമ്മേളനത്തില്‍ പ്രദര്‍ശിപ്പിച്ചു. ഇതേ ബാഗ് ബെഡ്‌റൂമില്‍ വച്ചും തുറന്നിരുന്നു. ആ സി സി ടി വി ദൃശ്യങ്ങള്‍ പരിശോധിക്കട്ടെ. അതില്‍ നിന്ന് മനസ്സിലാകും താന്‍ എപ്പോഴാണ് വന്നതെന്നും പോയതെന്നും. ബാഗും ശാസ്ത്രീയ പരിശോധനയ്ക്ക് വിധേയമാക്കട്ടെ. പണം കൊണ്ടുവന്നോ എന്ന് ആരോപണമുന്നയിക്കുന്നവര്‍ തെളിയിക്കണമെന്നും രാഹുല്‍ ആവശ്യപ്പെട്ടു.

കൂടെ ഉണ്ടാകുന്ന ആളുകളാണ് സാധാരണ തന്റെ ബാഗും പിടിക്കാറുള്ളത്. ഗൂഢാലോചനക്ക് പിന്നില്‍ ഒരു മാധ്യമ പ്രവര്‍ത്തകനുമുണ്ട്.