Oddnews
റീടെയില് രംഗത്ത് നവ്യാനുഭവം; ഷാര്ജ സെന്ട്രല് മാളില് ലുലു ഹൈപ്പര് മാര്ക്കറ്റ് തുറന്നു
അബൂദബി/ഷാര്ജ | ആഗോള നിലവാരത്തിലുള്ള ഷോപ്പിംഗ് സൗകര്യം ഒരുക്കിക്കൊണ്ട് ലുലുവിന്റെ പുതിയ ഹൈപ്പര് മാര്ക്കറ്റ് ഷാര്ജ ക്രിക്കറ്റ് സ്റ്റേഡിയത്തിനടുത്ത് സംനാനിലെ സെന്ട്രല് മാളില് പ്രവര്ത്തനമാരംഭിച്ചു. ഉദ്ഘാടനം പ്രമാണിച്ച് വിപുലമായ ഓഫറുകളാണ് അണിനിരത്തിയിരിക്കുന്നത്. എം എ യൂസഫലിയുടെ സാന്നിധ്യത്തില് ഷാര്ജ ചേംബര് ഓഫ് കോമേഴ്സ് ആന്ഡ് ഇന്ഡസ്ട്രിയുടെ ചെയര്മാന് അബ്ദുല്ല സുല്ത്താന് അല് ഒവൈസ് ആണ് ലുലു ഔട്ട്ലെറ്റിന്റെ ഉദ്ഘാടനം നിര്വഹിച്ചത്. ലുലു ഗ്രൂപ്പിന്റെ സി ഇ ഒ. സൈഫി രൂപാവാല, എക്സിക്യൂട്ടീവ് ഡയറക്ടര് എം എ അഷ്റഫ് അലി എന്നിവരും ഒപ്പമുണ്ടായിരുന്നു.
രണ്ടുനിലകളിലായി അഞ്ച് ലക്ഷം സ്ക്വയര് ഫീറ്റില് നിര്മിച്ചിരിക്കുന്ന ഷാര്ജ സെന്ട്രല് ആധുനിക ജീവിത ശൈലിക്ക് വേണ്ട എല്ലാ സംവിധാനങ്ങളും ഉള്ക്കൊണ്ടിരിക്കുന്ന ഷോപ്പിംഗ് മാള് ആണ്. 110,000 സ്ക്വയര് ഫീറ്റ് വിസ്തൃതിയുള്ള ലുലു ഹൈപ്പര് മാര്ക്കറ്റ് മാത്രമാണ് ഇന്ന് പ്രവര്ത്തനം ആരംഭിച്ചത്. വിശാലമായ ഫുഡ് കോര്ട്ട് അടക്കമുള്ള മറ്റ് സൗകര്യങ്ങള് ഉടന് തുറക്കും. 35,000 സ്ക്വയര് ഫീറ്റില് എന്റര്ടെയിന്മെന്റ് സംവിധാനവും 11 സിനിമാ തിയേറ്ററുകളും ഉടന് തുറക്കുന്നതോടെ ഷാര്ജയിലെ ഏറ്റവും വലിയ എന്റര്ടെയിന്മെന്റ് ഡെസ്റ്റിനേഷന് എന്ന രീതിയില് ഷാര്ജ സെന്ട്രല് അറിയപ്പെടും. 2,200 കാറുകള്ക്ക് പാര്ക്ക് ചെയ്യാന് സൗകര്യമുണ്ട്.
ഷാര്ജ ക്രിക്കറ്റ് സ്റ്റേഡിയം, വിമാനത്താവളം, കള്ച്ചറല് സ്ക്വയര്, ഗുബൈബ, വാസിത്, അല് തല്ല തുടങ്ങിയവയോട് സമീപത്തായി സ്ഥിതി ചെയ്യുന്ന സംനാന് ഏരിയയിലാണ് ഷാര്ജ സെന്ട്രല് എന്ന ഷോപ്പിംഗ് മാള് സ്ഥിതി ചെയ്യുന്നത്. സൂപ്പര് ഹൈപ്പര് മാര്ക്കറ്റുകളിലെ ഫ്രഷ് ഫുഡ്, ഹോട്ട് ഫുഡ്, ഗ്രോസറി വിഭവങ്ങള്, ഫുട്വെയര്, ഇലക്ട്രോണിക്സ്, ഹോം അപ്ലയന്സസ്, തുടങ്ങിയവയ്ക്ക് പുറമെ വിപുലമായ ഓര്ഗാനിക് ഫുഡ് സെക്ഷനും വേഗന് ഫുഡ് വിഭാഗവും യുഎ ഇ ഫ്രഷ് ഉത്പന്നങ്ങളുടെ വിപുലമായ ശേഖരവും ഈ ഔട്ട്ലെറ്റിന്റെ പ്രത്യേകതയാണ്.
മഹാമാരിയുടെ ഘട്ടത്തെ അതിജീവിച്ച് യു എ ഇ യുടെ ഭാവികാല വളര്ച്ച മുന്നില്ക്കണ്ട് ലുലു നടത്തിയ നിക്ഷേപമാണ് ഈ ഷാര്ജ സെന്ട്രല് മാള് എന്ന് എം എ യൂസഫലി പറഞ്ഞു. യു എ ഇയുടെ വികസനത്തിനൊപ്പം മുന്നോട്ട് പോകാന് ലുലുവിന് കഴിയുന്നതിന്റെ സന്തോഷവും ധന്യതയും എം എ യൂസഫലി ഉദ്ഘാടന ചടങ്ങില് പങ്കുവച്ചു. മഹാമാരിയുടെ ഘട്ടത്തില് വില വര്ധിപ്പിക്കാതെ യാതൊരു ദൗര്ലഭ്യവും കൂടാതെ ഭക്ഷണ സുരക്ഷ ഉറപ്പ് വരുത്തിയ യു എ ഇ യിലെ ഭരണാധികാരികളെ യൂസഫലി പ്രശംസിച്ചു. 2021 ല് മാത്രം ലുലു പുതിയ 20 ഔട്ട്ലെറ്റുകള് തുറന്നിട്ടുണ്ട്.