Kerala
വിവാദ അഭിമുഖം; രഞ്ജിത്തിനോട് വിശദീകരണം തേടി മന്ത്രി സജി ചെറിയാന്
ഡോക്ടര് ബിജു ഒക്കെ സ്വന്തം റെലവന്സ് എന്താണ് എന്ന് ആലോചിക്കണം എന്ന് അടുത്തിടെ ഒരു പത്രത്തിന് നല്കിയ അഭിമുഖത്തില് ചലച്ചിത്ര അക്കാദമി ചെയര്മാന് രഞ്ജിത്ത് പറഞ്ഞിരുന്നു
കോട്ടയം | വിവാദ അഭിമുഖത്തില് കേരള ചലച്ചിത്ര അക്കാദമി ചെയര്മാനായ രഞ്ജിത്തിനോട് വിശദീകരണം ആവശ്യപ്പെട്ട് സാംസ്കാരിക വകുപ്പ് മന്ത്രി സജി ചെറിയാന്.ചലച്ചിത്ര അക്കാദമി ചെയര്മാന് രഞ്ജിത്തുമായുള്ള തര്ക്കത്തിനിടെ കേരള സ്റ്റേറ്റ് ഫിലിം ഡെവലപ്മെന്റ് കോര്പ്പറേഷനില്നിന്ന് സംവിധായകന് ഡോ. ബിജു ഇന്നലെ രാജിവെച്ചിരുന്നു. കെഎസ്എഫ്ഡിസി ബോര്ഡ് മെമ്പര് സ്ഥാനമാണ് ഡോ. ബിജു രാജിവച്ചത്. തൊഴില്പരമായ കാരണങ്ങളാലാണ് രാജി എന്നാണ് കത്തില് ഡോ. ബിജു കാരണമായി വിശദീകരിക്കുന്നത്.
ചലച്ചിത്ര അക്കാദമി ചെയര്മാന് രഞ്ജിത്തുമായുള്ള തര്ക്കത്തില് നേരത്തെ തുറന്ന കത്തുമായി ഡോ. ബിജു രംഗത്തെത്തിയിരുന്നു.ഡോക്ടര് ബിജു ഒക്കെ സ്വന്തം റെലവന്സ് എന്താണ് എന്ന് ആലോചിക്കണം എന്ന് അടുത്തിടെ ഒരു പത്രത്തിന് നല്കിയ അഭിമുഖത്തില് ചലച്ചിത്ര അക്കാദമി ചെയര്മാന് രഞ്ജിത്ത് പറഞ്ഞിരുന്നു. ഇതാണ് പിന്നീട് വിവാദമായത്. ഇതിനുള്ള മറുപടിയാണ് തുറന്ന കത്തിലൂടെ ഡോ. ബിജു നല്കിയിരുന്നത്. ഒരു അന്താരാഷ്ട്ര ചലച്ചിത്ര മേളയുടെ ചെയര്മാന് ആയി ഇരിക്കാന് എന്തെങ്കിലും യോഗ്യതയോ റെലവന്സോ താങ്കള്ക്കുണ്ടോ എന്നത് സ്വയം ഒന്ന് ചിന്തിച്ചു നോക്കുമല്ലോ എന്നാണ് കത്തില് രഞ്ജിത്തിനോട് ഡോ.ബിജു പറയുന്നത്.