പാരാലിമ്പിക്‌സില്‍ നരേഷ് കുമാറിനെ പങ്കെടുപ്പിക്കാന്‍ നിര്‍ദേശിച്ച് സുപ്രീം കോടതി

ന്യൂഡല്‍ഹി | ഭിന്നശേഷിക്കാര്‍ക്കുള്ള ടോക്യോ പാരാലിമ്പിക്‌സില്‍ ഷൂട്ടിംഗ് താരം നരേഷ് കുമാറിനെ ഉള്‍പ്പെടുത്താന്‍ പാരാലിമ്പിക് കമ്മിറ്റി ഓഫ് ഇന്ത്യയോട് ആവശ്യപ്പെട്ട് സുപ്രീം കോടതി. എ എം ഖാന്‍വില്‍ക്കര്‍, വി ആര്‍ ഗവായ്, കൃഷ്ണ മുരാരി എന്നിവര്‍ അടങ്ങിയ ബഞ്ചാണ് നിര്‍ദേശിച്ചത്.

രാവിലെ ഈ കേസ് അടിന്തരമായി കേള്‍ക്കാന്‍ ബഞ്ച് തീരുമാനിച്ചിരുന്നു. അഡീഷണല്‍ എന്‍ട്രിയായി ഇദ്ദേഹത്തെ മത്സരിപ്പിക്കാന്‍ നിര്‍ദേശിക്കണമെന്നാണ് കോടതി ആവശ്യപ്പെട്ടത്. നേരത്തേ കേസില്‍ ഇടപെടില്ലെന്ന് ഡല്‍ഹി ഹൈക്കോടതി വ്യക്തമാക്കിയുരുന്നു.

വിഷയത്തില്‍ പുനഃപരിശോധന നടത്താന്‍ കായിക മന്ത്രാലയത്തോടും സ്‌പോര്‍ട്ട്‌സ് അതോറിറ്റി ഓഫ് ഇന്ത്യയോടും ഡല്‍ഹി ഹൈക്കോടതി ആവശ്യപ്പെട്ടിരുന്നു. സുതാര്യതയില്ലാതെയും സ്വജനപക്ഷപാതപരമായും നരേഷ് കുമാറിന്റെ  പ്രകടനത്തെ പരിഗണിക്കാതെയും മറ്റൊരു താരത്തെ പരിഗണിച്ചെന്നായിരുന്നു കേസ്.