നിയന്ത്രണ രേഖക്ക് സമീപം ഏറ്റുമുട്ടല്‍; രണ്ട് പാക് ഭീകരര്‍ കൊല്ലപ്പെട്ടു; മലയാളി ഉൾപ്പെടെ രണ്ട് സൈനികര്‍ക്ക് വീരമൃത്യു

ശ്രീനഗര്‍ | നിയന്ത്രണ രേഖക്ക് സമീപം നടന്ന ഏറ്റുമുട്ടലില്‍ രണ്ട് പാക് ഭീകരര്‍ കൊല്ലപ്പെട്ടു. പ്രത്യാക്രമണത്തില്‍ മലയാളി ജവാൻ ഉൾപ്പെടെ രണ്ട് ഇന്ത്യന്‍ സൈനികര്‍ വീരമൃത്യു വരിച്ചതായും ജമ്മു കശ്മീരിലെ പ്രതിരോധ വക്താവ് അറിയിച്ചു. കോഴിക്കോട് കൊയിലാണ്ടി സ്വദേശി എം ശ്രീജിത്താണ് വീരമൃത്യു വരിച്ച മലയാളി ജവാന്‍.

കഴിഞ്ഞ ഏതാനും ദിവസങ്ങള്‍ക്കുള്ളില്‍ നിയന്ത്രണ രേഖയിലുണ്ടാകുന്ന രണ്ടാമത്തെ ഏറ്റുമുട്ടലാണ് ഇത്. നിയന്ത്രണ രേഖയില്‍ വെടിനിര്‍ത്തല്‍ ലംഘനം പതിവാകുകയാണ്.

പാകിസ്ഥാന്‍ ആസ്ഥാനമായി പ്രവര്‍ത്തിക്കുന്ന ഭീകരസംഘമായ ലഷ്‌കര്‍ ഇ തൊയ്ബ ജമ്മു മേഖലയിലെ ഇന്ത്യന്‍ എയര്‍ ഫോഴ്‌സ് താവളത്തില്‍ ഡ്രോണ്‍ ആക്രമണം നടത്തി ഒരു മാസത്തിനിടെയാണ് മേഖലയില്‍ ഏറ്റുമുട്ടല്‍ പതിവാകുന്നത്.