Kerala
തിരഞ്ഞെടുപ്പ് ഫണ്ടില് തിരിമറിയെന്നും വോട്ട് മറിച്ചെന്നും ആരോപണം; സി കെ ജാനുവിനെ സ്വന്തം പാര്ട്ടി സസ്പെന്ഡ് ചെയ്തു
സുല്ത്താന് ബത്തേരി | തിരഞ്ഞെടുപ്പ് ഫണ്ടില് തിരിമറി നടത്തിയെന്നും വോട്ടുകള് മറിച്ചെന്നും ആരോപിച്ച് സി കെ ജാനുവിനെ അവരുടെ സ്വന്തം പാര്ട്ടിയായ ജനാധിപത്യ രാഷ്ട്രീയ സഭ സസ്പെന്ഡ് ചെയ്തു. സുല്ത്താന് ബത്തേരിയിലെ എന് ഡി എ സ്ഥാനാര്ഥിയായിരുന്നു ഇത്തവണ സി കെ ജാനു. സംസ്ഥാന അധ്യക്ഷ സ്ഥാനത്ത് നിന്ന് ജാനുവിനെ നീക്കിയതായും പാര്ട്ടിയില് നിന്ന് ആറു മാസത്തേക്ക് സസ്പെന്ഡ് ചെയ്തതായും പാര്ട്ടി സംസ്ഥാന സെക്രട്ടറി പ്രകാശന് മൊറാഴ അറിയിച്ചു.
ബി ജെ പി നേതാക്കളുമായി ചേര്ന്നാണ് ജാനു ഫണ്ട് തിരിമറിയും വോട്ട് മറിക്കലും നടത്തിയതെന്നും നേതൃത്വം ആരോപിക്കുന്നു. മണ്ഡലത്തില് ഇത്തവണ ജാനുവിന് വോട്ട് വലിയ തോതില് കുറഞ്ഞിരുന്നു. ബി ജെ പിയുടെ താമര ചിഹ്നത്തില് മത്സരിച്ച ജാനുവിന് 15,198 വോട്ടുകള് മാത്രമാണ് കിട്ടിയത്. 2016ലെ തിരഞ്ഞെടുപ്പില് 27,920 വോട്ടുകള് ലഭിച്ചിടത്താണിത്.