Kerala
സുരക്ഷാക്രമീകരണങ്ങള് പൂര്ത്തിയായതായി ഡിജിപി; നിരീക്ഷണത്തിനായി ഡ്രോണുകളും
തിരുവനന്തപുരം | നിയമസഭാ തിരഞ്ഞെടുപ്പിനോടനുബന്ധിച്ചുള്ള എല്ലാ സുരക്ഷാക്രമീകരണങ്ങളും പൂര്ത്തിയാക്കിയതായി ഡിജിപി ലോക്നാഥ് ബെഹ്റ അറിയിച്ചു. ഏത് അടിയന്തര സാഹചര്യവും നേരിടാന് 95 കമ്പനി പോലീസ് സേനയെയാണ് വിവിധ കേന്ദ്രങ്ങളില് വിന്യസിച്ചിരിക്കുന്നത്. രാവിലെ മുതല് തന്നെ ഡ്രോണ് നിരീക്ഷണം ഏര്പ്പെടുത്തും. ഇതിന്റെ ദൃശ്യങ്ങള് അപ്പപ്പോള് പട്രോളിംഗ് ടീമിനും പോലീസ് ആസ്ഥാനത്തെ ഇലക്ഷന് കണ്ട്രോള് റൂമിനും ലഭ്യമാക്കും . അതിര്ത്തികള് വഴിയുള്ള മദ്യം കടത്തല്, കള്ളക്കടത്ത് മുതലായവ തടയുന്നതിനും മറ്റുമായി 152 അതിര്ത്തി കേന്ദ്രങ്ങളില് പ്രത്യേക പരിശോധനയും നിരീക്ഷണവും തുടങ്ങി.
പോളിംഗ് ബൂത്തുകള് സ്ഥിതിചെയ്യുന്ന 13,830 സ്ഥലങ്ങളെ ബന്ധിപ്പിച്ച് 1694 ഗ്രൂപ്പ് പട്രോള് ടീമുകള് ഉണ്ട്. എട്ടോ പത്തോ സ്ഥലങ്ങളിലുള്ള പോളിംഗ് ബൂത്തുകള് പരമാവധി 15 മിനിറ്റിനുള്ളില് ഒരു ടീമിന് ചുറ്റിവരാന് കഴിയുന്ന രീതിയിലാണ് ക്രമീകരണം.
ഓരോ ടീമിലും ഒരു വീഡിയോഗ്രാഫറും ഉണ്ടായിരിക്കും. കൂടാതെ ഓരോ പോലീസ് സ്റ്റേഷനും കേന്ദ്രീകരിച്ച് കേന്ദ്രസേനാംഗങ്ങള് ഉള്പ്പെട്ട ഒരു ലോ ആന്റ് ഓര്ഡര് പട്രോള് ടീം, ഡിവൈ.എസ്.പിയുടെ നേതൃത്വത്തില് ഓരോ ഇലക്ഷന് സബ്ബ് ഡിവിഷനിലും പ്രത്യേക പട്രോള് ടീം എന്നിവയും ക്രമസമാധാനപാലനത്തിന് ഉണ്ടായിരിക്കും. നക്സല് ബാധിതപ്രദേശങ്ങളില് സ്പെഷ്യല് ഓപ്പറേഷന് ഗ്രൂപ്പും തണ്ടര്ബോള്ട്ടും നിരീക്ഷണത്തിലാണ്