മക്കയിൽ പരിശോധന ശക്തമാക്കി; അനുമതിപത്രമില്ലാതെ ഉംറ നിർവഹിക്കാനെത്തുന്നവർക്കെതിരെ കർശന നടപടി

മക്ക | ഉംറ കർമം നിർവഹിക്കുന്നതിനായി മസ്ജിദുൽ ഹറമിലേക്ക് വിശ്വാസികളുടെ ഒഴുക്ക് തുടങ്ങിയതോടെ അനുമതി പത്രമില്ലാതെ ഉംറക്കും ജുമുഅ- ജമാഅത്ത് നിസ്‌കാരങ്ങളിലും പങ്കെടുക്കാനെത്തുന്നവരെ കണ്ടെത്തുന്നതിനായി പ്രവേശന കവാടങ്ങളിൽ പരിശോധന കർശനമാക്കിയതായി ഹജ്ജ്- ഉംറ മന്ത്രാലയം അറിയിച്ചു.

കൊറോണവൈറസ് പടരുന്നത് നിയന്ത്രിക്കുന്നതിനും തീർഥാടകരുടെ സുരക്ഷ സംരക്ഷിക്കുന്നതിന്റെ ഭാഗമായി നിയന്ത്രണങ്ങൾ കർശനമാക്കിയെങ്കിലും നിരവധി പേർ അനുമതിയില്ലാതെ കഴിഞ്ഞ ദിവസങ്ങളിൽ എത്തിയതായി സഊദി ഡെപ്യൂട്ടി മന്ത്രി ഹജ്ജ്- ഉംറ മന്ത്രി ഡോ. അബ്ദുൽ ഫത്ത ബിൻ സുലൈമാൻ മഷാത് പറഞ്ഞു. തുടർ നടപടികൾക്കായി നിയമലംഘകരെ ബന്ധപ്പെട്ട അധികാരികൾക്ക് റിപ്പോർട്ട് ചെയ്തിട്ടുണ്ട്.

ഹജ്ജ്- ഉംറ മന്ത്രാലയം പുറത്തിറക്കിയ ആപ്പ് വഴിയാണ് ഉംറ നിർവഹിക്കുന്നതിനുള്ള അനുമതിക്കായി അപേക്ഷിക്കേണ്ടതെന്നും യാത്രക്ക് മുൻപ്  പെർമിറ്റ് നേടിയിട്ടുണ്ടെന്ന് ഉറപ്പുവരുത്തണമെന്നും വ്യാജ ഉംറ പെർമിറ്റുകൾ നൽകുന്ന സ്ഥാപനങ്ങളുമായി ബന്ധപ്പെടരുതെന്നും മന്ത്രി പറഞ്ഞു.