തളിപ്പറമ്പ്, ആലത്തൂര്‍ മണ്ഡലങ്ങള്‍ കോണ്‍ഗ്രസിനു വിട്ടുകൊടുക്കും: പി ജെ ജോസഫ്

പത്തനംതിട്ട | കഴിഞ്ഞതവണ കേരള കോണ്‍ഗ്രസ് മത്സരിച്ച വടക്കന്‍ കേരളത്തിലെ തളിപ്പറമ്പ്, ആലത്തൂര്‍ മണ്ഡലങ്ങള്‍ കോണ്‍ഗ്രസിനു വിട്ടുകൊടുക്കുമെന്ന് പി ജെ ജോസഫ്. പത്തനംതിട്ടയില്‍ മാധ്യമ പ്രവര്‍ത്തകരോടു സംസാരിക്കുകയായിരുന്നു അദ്ദേഹം. രണ്ടു മണ്ഡലങ്ങളിലും കേരള കോണ്‍ഗ്രസിനേക്കാള്‍ കോണ്‍ഗ്രസിനായിരിക്കും വിജയ സാധ്യതയെന്ന് ജോസഫ് പറഞ്ഞു.

യു ഡി എഫില്‍ 12 സീറ്റുകള്‍ വേണമെന്ന ആവശ്യത്തില്‍ കേരള കോണ്‍ഗ്രസ് ജോസഫ് വിഭാഗം ഉറച്ചു നില്‍ക്കുകയാണ്. കഴിഞ്ഞതവണ മത്സരിച്ച 15 സീറ്റുകളില്‍ രണ്ടെണ്ണം വിട്ടുനല്‍കുകയും പാലാ സീറ്റ് മാണി സി കാപ്പന്‍ മത്സരിക്കുന്നുവെങ്കില്‍ അദ്ദേഹത്തിനുവേണ്ടി നല്‍കുകയും ചെയ്യും. യു ഡി എഫില്‍ അടുത്ത ചര്‍ച്ച നാളെയാണ്. ഓരോ പാര്‍ട്ടികള്‍ക്കും സീറ്റു നിര്‍ണയത്തില്‍ അവരുടേതായ അഭിപ്രായങ്ങളുണ്ടാകും. ചര്‍ച്ചയിലൂടെ പരിഹാരം കാണുകയാണ് വേണ്ടത്.

കേരള കോണ്‍ഗ്രസ് സീറ്റുകളില്‍ വച്ചുമാറ്റം ആലോചനയില്‍ ഇല്ല. തിരുവല്ല സീറ്റ് റാന്നിയുമായി വച്ചുമാറുന്നതിനെക്കുറിച്ച് ചര്‍ച്ച നടന്നിട്ടില്ല. അതിന്റെ ആവശ്യമില്ലെന്നും ജോസഫ് പറഞ്ഞു. വിജയസാധ്യതയാകും പാര്‍ട്ടിയുടെ സ്ഥാനാര്‍ഥി നിര്‍ണയത്തില്‍ അടിസ്ഥാന ഘടകമാകുകയെന്നും പുതുമുഖങ്ങള്‍ക്കു പ്രാതിനിധ്യം ഉണ്ടാകുമെന്നും ജോസഫ് പറഞ്ഞു.