കൊവിഡിന്റെ ഗുരുതരാവസ്ഥ തടയാന്‍ 100 ശതമാനം കഴിയും: സ്വന്തം വാക്‌സിനില്‍ അവകാശവാദവുമായി മൊഡേണ

ന്യൂയോര്‍ക്ക് | വികസിപ്പിച്ചെടുത്ത കൊവിഡ് വാക്‌സിന്‍ ഗുരുതര രോഗങ്ങള്‍ തടയുന്നതില്‍ 100 ശതമാനം ഫലപ്രദമാണെന്ന അവകാശവാദവുമായി മൊഡേണ കമ്പനി. അവസാനഘട്ട പരീക്ഷണം 94 ശതമാനം വിജയമാണ്. അമേരിക്കയിലും യൂറോപ്പിലും അടിയന്തരമായി വാക്‌സിന്‍ ഉപയോഗിക്കാന്‍ അനുമതിതേടി അധികൃതരെ സമീപിക്കുമെന്നും ഇവര്‍ പറഞ്ഞു.

30,000 പേരില്‍ നടത്തിയ പരീക്ഷണത്തിനിടെ വാക്സിന്‍ സ്വീകരിച്ച 11 പേര്‍ക്കും മറ്റുവസ്തു നല്‍കിയ 185 പേര്‍ക്കും കൊവിഡ് സ്ഥിരീകരിച്ചു. ഇവരില്‍ ഗുരുതര രോഗം ബാധിച്ച 30 പേരും വാക്സിന് പകരം മറ്റുവസ്തുക്കള്‍ നല്‍കിയ വിഭാഗത്തില്‍പ്പെട്ടവര്‍ ആയിരുന്നു. ഇതില്‍നിന്നാണ് ഗുരുതര രോഗബാധ തടയുന്നതില്‍ വാക്സിന്‍ 100 ശതമാനവും ഫലപ്രദമാണെന്ന് കണ്ടെത്തിയത് എന്നാണ് മൊഡേണ വ്യക്തമാക്കിയിട്ടുള്ളത്.

അമേരിക്കയില്‍ അടിയന്തര ഉപയോഗത്തിന് അനുമതി ലഭിക്കുന്ന രണ്ടാമത്തെ കൊവിഡ് വാക്സിനായിരിക്കും മൊഡേണയുടേത്. തങ്ങളുടെ വാക്സിന്‍ ഫലപ്രദമാണെന്ന് തെളിയിക്കാന്‍ കഴിയുന്ന എല്ലാ വിവരങ്ങളും കൈവശമുണ്ടെന്നാണ് മോഡേണ അവകാശപ്പെടുന്നത്. കൊവിഡ് വ്യാപനം തടയുന്നതില്‍ തങ്ങള്‍ക്ക് സുപ്രധാന പങ്ക് വഹിക്കാന്‍ കഴിയുമെന്നാണ് പ്രതീക്ഷിക്കുന്നതെന്ന് മൊഡേണയുടെ ചീഫ് മെഡിക്കല്‍ ഓഫീസര്‍ ഡോ. ടാല്‍ സാക്സ് പറഞ്ഞു.

തങ്ങളുടെ വാക്സിന്‍ 95 ശതമാനം ഫലപ്രദമാണെന്ന് അമേരിക്കന്‍ കമ്പനിയായ ഫൈസറും ജര്‍മന്‍ പങ്കാളിയായ ബയോന്‍ടെക്കും നേരത്തെ പ്രഖ്യാപിച്ചിരുന്നു. അടിയന്തര ഉപയോഗത്തിന് അനുമതി തേടി ഫൈസര്‍ ഒരാഴ്ച മുമ്പുതന്നെ അധികൃതരെ സമീപിക്കുകയും ചെയ്തിരുന്നു.