Socialist
തിരുത്ത് മൂല്യവത്തായ പ്രവൃത്തി
തിരുത്ത് ഏറ്റവും മൂല്യവത്തായ പ്രവർത്തിയാണ്. നിരന്തരം തിരുത്തലുകൾക്ക് വിധേയമായാണ് ഇടതുപക്ഷവും മറ്റു പുരോഗമന പക്ഷക്കാരും മുന്നേറേണ്ടത്. പോലീസ് നിയമ ഭേദഗതിയിൽ ഉറച്ചു നിൽക്കാതെ തിരുത്തിന് തയ്യാറായത് നല്ല കാര്യം. അതാണ് കേരളത്തിലെ പൗരസമൂഹം ഇന്നലെ ആവശ്യപ്പെട്ടത്. ആ സമ്മർദ്ദത്താലാണ് കേരള ഗവൺമെൻ്റ് തിരുത്തിന് തയ്യാറായത്. കേരള സമൂഹത്തിന് അഭിവാദ്യങ്ങൾ. ഇതൊരു സമയോചിത ഇടപെടലായിരുന്നു.
അതോടൊപ്പം ഈ സാഹചര്യം മറ്റു പല ചോദ്യങ്ങളും മുന്നോട്ടു വെക്കുന്നുണ്ട്. ഇത്രയും കടുത്ത ഒരനീതി നിയമമായി ജനസമക്ഷം എത്തും മുമ്പേ എന്തുകൊണ്ട് തിരുത്തപ്പെട്ടില്ല എന്ന ചോദ്യം കേരളത്തിലെ ഇടതുപക്ഷം സ്വയം ചോദിച്ചേ മതിയാവൂ. ഇത് ശരിയല്ല എന്നുറക്കെപ്പറയാൻ നമ്മുടെ മന്ത്രിസഭയിൽ ആരുമുണ്ടായില്ലെന്നാണോ ? ഇത് ചെയ്യരുത് എന്ന് ശഠിക്കാൻ ഇടതുപക്ഷ കൂട്ടായ്മയിൽ ഒരു പാർട്ടിയുമുണ്ടായില്ലെന്നാണോ?
ഇത് ഇടതുപക്ഷ വിരുദ്ധ നിയമമാണെന്ന് പറയാൻ സി.പി. എം എന്ന പാർട്ടിക്കു കഴിയാതെ പോയതെന്തുകൊണ്ട് ? സി.പി.എം നേതൃത്വത്തിലുള്ള ഏക ഗവൺമെൻ്റ് എന്തൊക്കെ ചെയ്യുന്നു എന്നു നോക്കാൻ, എന്തു ചെയ്യരുത് എന്ന് ചിന്തിച്ചു വിലക്കാൻ കഴിയുന്നില്ലെങ്കിൽ പിന്നെയെന്താണ് സി.പി.എം പോളിറ്റ് ബ്യൂറോ ചെയ്യുന്നത്? അതല്ല, ഇവിടെ കാര്യങ്ങളെല്ലാം തീരുമാനിക്കുന്നത് ഇവരാരുമായും ചർച്ച ചെയ്യാതെയും ഇവരാരെയും അറിയിക്കാതെയുമാണെന്നാണോ മനസ്സിലാക്കേണ്ടത് ? ഇതെന്തു രാഷ്ട്രീയമാണ് ?
പാർട്ടിയറിയാതെ തിരുമാനമെടുക്കുന്ന ഇടതു മന്ത്രിസഭ എന്തായാലും കേരളത്തിൽ ഇതാദ്യത്തേതാണ്. മറിച്ച് മന്ത്രിസഭയോ മുഖ്യമന്ത്രിയോ എടുക്കുന്ന തീരുമാനങ്ങൾ അപ്പാടെ അംഗീകരിക്കുന്ന പാർട്ടി സംവിധാനമാണ് നിലവിലുള്ളതെങ്കിൽ അതും കേരളത്തിൽ ഇതാദ്യമായാണ്. രണ്ടായാലും ഇക്കാര്യത്തിൽ അടിയന്തര തിരുത്ത് ആവശ്യമാണ്. ആ തിരുത്താണ് സീതാറാം യെച്ചൂരി ഒട്ടും സമയം കളയാതെ ഉറപ്പു വരുത്തേണ്ടത്. ചിന്തിക്കാത്ത ഒരു പാർട്ടിയുടെ ജനറൽ സെക്രട്ടറിയല്ല അദ്ദേഹം എന്ന് സഖാക്കളെ ബോദ്ധ്യപ്പെടുത്തേണ്ടതുണ്ട്.