നരിയംപാറ പീഡനം; ഇരയായ പെണ്‍കുട്ടിയുടെ ചിത്രം പ്രചരിപ്പിച്ച സംഭവത്തില്‍ അന്വേഷണം തുടങ്ങി

കട്ടപ്പന | ഇടുക്കി നരിയംപാറയില്‍ പീഡനത്തിനിരയായതിനെ തുടര്‍ന്ന് ജീവനൊടുക്കിയ പെണ്‍കുട്ടിയുടെ ചിത്രം സാമൂഹിക മാധ്യമങ്ങളില്‍ പ്രചരിപ്പിച്ച സംഭവത്തില്‍ അന്വേഷണം ആരംഭിച്ചു. കട്ടപ്പന പോലീസാണ് കേസെടുത്ത് അന്വേഷണം ആരംഭിച്ചത്. സംഭവവുമായി ബന്ധപ്പെട്ട് പെണ്‍കുട്ടിയുടെ കുടുംബം പരാതി നല്‍കിയിരുന്നു.

കേസിലെ പ്രതി മനു മനോജ് ആത്മഹത്യ ചെയ്തതിനു ശേഷമാണ് ഇയാളോടൊത്തുള്ള പെണ്‍കുട്ടിയുടെ ചിത്രം വ്യാപകമായി പ്രചരിപ്പിക്കാന്‍ തുടങ്ങിയത്. സാമൂഹിക മാധ്യമങ്ങളില്‍ മാത്രമല്ല, ചിലയിടങ്ങളില്‍ മനുവിന് ആദരാഞ്ജലികള്‍ അര്‍പ്പിച്ച് സ്ഥാപിച്ച ഫ്‌ളക്‌സുകളിലും പെണ്‍കുട്ടിയുടെ ചിത്രമുണ്ട്. ഫ്‌ളക്‌സുകള്‍ സ്ഥാപിച്ചവര്‍ക്കെതിരെയും കേസെടുക്കുമെന്ന് പോലീസ് വ്യക്തമാക്കി.