Ongoing News
മുന് രഞ്ജി താരം എം സുരേഷ് കുമാര് ആത്മഹത്യ ചെയ്ത നിലയില്
ആലപ്പുഴ | കേരളത്തിന്റെ മുന് രഞ്ജി ട്രോഫി ക്രിക്കറ്റ് താരം എം സുരേഷ് കുമാറിനെ (47) ആത്മഹത്യ ചെയ്ത നിലയില് കണ്ടെത്തി. ആലപ്പുഴ പഴവീട്ടിലെ വീട്ടില് തൂങ്ങിമരിച്ച നിലയിലാണ് അദ്ദേഹത്തെ കണ്ടെത്തിയത്. റെയില്വേ ഉദ്യോഗസ്ഥനായിരുന്നു. സുഹൃത്തുക്കള് ഉംബ്രി എന്ന ഓമനപ്പേരില് വിളിച്ചിരുന്നു സുരേഷ് മികച്ച ഓഫ് സ്പിന്നറും ബാറ്റ്സ്മാനുമായിരുന്നു.
1990-ല് രാഹുല് ദ്രാവിഡിന്റെ നേതൃത്വത്തില് ഇറങ്ങിയ ഇന്ത്യന് അണ്ടര്-19 ടീമില് അംഗമായിരുന്നു. സ്റ്റീഫന് ഫ്ളെമിംഗും ഡിയോണ് നാഷും ഉള്പ്പെട്ട ന്യൂസിലന്ഡ് ടീമിനെതിരേ യൂത്ത് ടെസ്റ്റും ഏകദിന പരമ്പരയും കളിച്ചിട്ടുണ്ട്. 72 ഫസ്റ്റ് ക്ലാസ് മത്സരങ്ങളില് നിന്നായി ഒരു സെഞ്ച്വറി ഉള്പ്പെടെ 1,657 റണ്സും 196 വിക്കറ്റുകളും നേടിയിട്ടുണ്ട്. ഏഴ് അര്ധ ശതകങ്ങളും 12 തവണ അഞ്ചു വിക്കറ്റ് നേട്ടവും സ്വന്തമാക്കി. 51 ലിസ്റ്റ് എ മത്സരങ്ങളില് നിന്ന് 433 റണ്സും 52 വിക്കറ്റുകളും സ്വന്തം പേരില് കുറിച്ചിട്ടുണ്ട്.
1994-95 രഞ്ജി സീസണില് തമിഴ്നാടിനെ ആദ്യമായി തോല്പ്പിച്ച കേരള രഞ്ജി ട്രോഫി ടീമില് അംഗമായിരുന്നു സുരേഷ്. ആ മത്സരത്തില് 12 വിക്കറ്റുകള് കൊയ്ത് ടീമിനു വിജയം നേടിക്കൊടുക്കുന്നതില് പ്രധാന പങ്കു വഹിക്കാനും സുരേഷിനു കഴിഞ്ഞു.