എന്‍ ഐ എ അറസ്റ്റ് ചെയ്ത ശുഐബിനെ ബെംഗളൂരുവിലേക്ക് കൊണ്ടുപോകും

തിരുവനന്തപുരം |  തീവ്രവാദ ബന്ധം ആരോപിച്ച് തിരുവനന്തപുരം വിമാനത്താവളത്തില്‍ നിന്ന് ഐ എ അറസ്റ്റ് ചെയ്ത കണ്ണൂര്‍ കൊയ്യം സ്വദേശി ശുഐബിനെ ഇന്ന് ബെംഗളൂരുവിലേക്ക് കൊണ്ടുപോകും. ഇയാള്‍ ഇന്ത്യന്‍ മുജാഹിദീന്‍ പ്രവര്‍ത്തകനാണെന്നും ബെംഗളൂരുവിലെ തീവ്രവാദ വിരുദ്ധ സേന അന്വേഷിക്കുന്ന പ്രതിയാണെന്നുമാണ് എന്‍ ഐ എ പറയുന്നത്. ബെംഗളൂരു സ്ഫോടനക്കേസിലെ 32-ാം പ്രതിയായ ശുഐബിനെ കൊണ്ടുപോകാന്‍ അവിടെ നിന്ന് രണ്ട് ഉദ്യോഗസ്ഥര്‍ എത്തിയിട്ടുണ്ട്.ശുഐബിനെ കൊച്ചിയിലെത്തിയ ശേഷമാകും ബെംഗളൂരുവിലേക്ക് കൊണ്ടുപോകുക.
ശുഐബിനൊപ്പം അറസ്റ്റിലായ ഉത്തര്‍പ്രദേശ് ശരണ്‍പുര്‍ ദേവ്ബന്ദ് ഫുല്ല സ്വദേശി മുഹമ്മദ് ഗുല്‍നവാസിനെ ഡല്‍ഹിയിലേക്ക് കൊണ്ടുപോകും. ഡല്‍ഹിയില്‍ ഇയാളുടെ പേരില്‍ ഹവാല കേസുണ്ട്.

ഒന്നരവര്‍ഷമായി സഊദിയിലെ ജയിലിലായിരുന്ന ഇരുവരെയും അവിടെനിന്ന് നാടുകടത്തി ഇവിടെയെത്തിച്ചാണ് അറസ്റ്റ് രേഖപ്പെടുത്തിയത്. ഇരുവര്‍ക്കുമെതിരേ നേരത്തെ എന്‍ ഐ എ തിരച്ചില്‍ നോട്ടീസ് പുറപ്പെടുവിച്ചിരുന്നു.