Kerala
ട്രഷറി തട്ടിപ്പ്: ബിജുലാല് കുറ്റം സമ്മതിച്ചതായി അന്വേഷണ സംഘം
തിരുവനന്തപുരം | വഞ്ചിയൂര് സബ് ട്രഷറിയില് നിന്ന് രണ്ട് കോടി രൂപ തട്ടിച്ച കേസിലെ പ്രധാനപ്രതി ബിജുലാല് പ്രാഥമിക ചോദ്യം ചെയ്യലില് തന്നെ കുറ്റം സമ്മതിച്ചെന്ന് ക്രൈംബ്രാഞ്ച് . 75 ലക്ഷം രൂപ ട്രഷറിയില് നിന്ന് തട്ടിയെടുത്തെന്ന് പ്രതി കുറ്റസമ്മതം നടത്തിയതായും അന്വേഷക സംഘം വ്യക്്തമാക്കി. കഴിഞ്ഞ ഡിസംബര് മുതലാണ് പ്രതി തട്ടിപ്പ് തുടങ്ങിയത്.
കേസെടുത്തതിന് പിന്നാലെ ഇന്ന് രാവിലെയാണ് ബിജുലാല് പോലീസിന്റെ പിടിയിലായത്. തിരുവനന്തപുരത്ത് അഭിഭാഷകന്റെ ഓഫീസില് മാധ്യമങ്ങളോട് സംസാരിക്കുന്നതിനിടെയാണ് ബിജുവിനെ ക്രൈംബ്രാഞ്ച് കസ്റ്റഡിയിലെടുത്തത്.
നാല് ദിവസത്തിലേറെയായി പൊലീസ് അന്വേഷിക്കുന്ന ബിജുലാല് താന് കുറ്റമൊന്നും ചെയ്തിട്ടില്ലെന്ന അവകാശവാദവുമായാണ് മാധ്യമങ്ങള്ക്ക് മുന്നിലെത്തിയത്. തന്റെ പാസ് വേര്ഡ് ഉപയോഗിച്ച് മറ്റാരോ തട്ടിപ്പ് നടത്തിയാതാകാമെന്നും ബിജുലാല് അവകാശപ്പെട്ടു. തിരുവനന്തപുരം വഞ്ചിയൂരിലെ അഭിഭാഷകന്റെ ഓഫിസില് മാധ്യമങ്ങളോട് സംസാരിക്കുന്നതിനിടെ ക്രൈംബ്രാഞ്ച് സംഘം ബിജുവിനെ കസ്റ്റഡിയിലെടുത്തത്. കോടതിയില് കീഴടങ്ങുകയായിരുന്നു ബിജുവിന്റെ ലക്ഷ്യമെങ്കിലും ഇതിന് മുമ്പുതന്നെ അറസ്റ്റ് നടന്നു.
ഓണ്ലൈന് ചീട്ടുകളിയിലുണ്ടായ നഷ്ടം നികത്താനാണ് മോഷണം നടത്തിയതെന്നു പ്രതി പറഞ്ഞതായും റിപ്പോര്ട്ടുകളുണ്ട്. അറസ്റ്റിന് പിന്നാലെ തിരുവനന്തപുരം ജനറല് ആശുപത്രിയില് ബിജുവിനെ എത്തിച്ച് കൊവിഡ് പരിശോധന നടത്തി. നാളെയാകും കോടതിയില് ഹാജരാക്കുക. ജില്ലാ കലക്ടറുടെ അക്കൗണ്ടില് നിന്നാണ് വിരമിച്ച ഉദ്യോഗസ്ഥന്റെ യൂസര് ഐഡിയും പാസ് വേര്ഡും ഉപയോഗിച്ച് ബിജുലാല് രണ്ട് കോടി രൂപ തട്ടിയെടുത്തത്.