ഐസ്‌ക്രീമും തണുത്ത ഭക്ഷ്യവസ്തുക്കളും കൊവിഡ് പരത്തുമെന്ന പ്രചാരണം തള്ളി കേന്ദ്രം

മുംബൈ | ഐസ്‌ക്രീമും തണുത്ത ഭക്ഷ്യവസ്തുക്കളും കൊറോണ വൈറസ് വ്യാപനത്തിന് കാരണമാകുമെന്ന പ്രചാരണത്തെ തള്ളി കേന്ദ്ര സര്‍ക്കാര്‍. ഇവ കഴിക്കുന്നത് വൈറസ് വ്യാപനത്തിന് കാരണമാകില്ലെന്ന് പ്രസ് ഇന്‍ഫര്‍മേഷന്‍ ബ്യൂറോയുടെ മഹാരാഷ്ട്ര ഓഫീസ് ട്വീറ്റ് ചെയ്തു. ഇത്തരമൊരു വാദത്തിന് ശാസ്ത്രീയ തെളിവില്ലെന്ന് ലോകാരോഗ്യ സംഘടന വ്യക്തമാക്കിയതും പി ഐ ബിയുടെ ട്വീറ്റില്‍ പറയുന്നു.

കൊറോണ വൈറസ് വ്യാപനത്തിന്റെ പ്രാരംഭഘട്ടത്തില്‍ തന്നെ നിരവധി ഊഹോപോഹങ്ങളും കെട്ടുകഥകളും ലോകവ്യാപകമായി പ്രചരിച്ചിരുന്നു. ഇത്തരം തെറ്റായ വിവരങ്ങള്‍ക്ക് അവസാനം കുറിക്കുന്നതിന്, ലോകാരോഗ്യ സംഘടന സുദീര്‍ഘ റിപ്പോര്‍ട്ട് പുറത്തുവിട്ടിരുന്നു. വെളുത്തുള്ളി ഉപയോഗിക്കുന്നത് കൊറോണവൈറസ് ബാധിക്കുന്നത് തടയുമെന്ന പ്രചാരണമുണ്ടായിരുന്നു. ഇത് തെറ്റാണെന്ന് ഡബ്ല്യു എച്ച് ഒയുടെ റിപ്പോര്‍ട്ടില്‍ പറയുന്നു.

സസ്യാഹാരം കൊവിഡ് വ്യാപനം തടയുമെന്ന അവകാശവാദങ്ങളെ ഡല്‍ഹി എയിംസ് സെന്ററ് ഫോര്‍ കമ്യൂണിറ്റി മെഡിസിന്‍ സെന്ററിലെ പ്രൊഫസര്‍ ഡോ.ആനന്ദ് കൃഷ്ണന്‍ തള്ളിക്കളഞ്ഞിട്ടുണ്ട്.