കൊവിഡ്: പ്രധാന മന്ത്രി ഏപ്രില്‍ 27ന് മുഖ്യമന്ത്രിമാരുമായി ചര്‍ച്ച നടത്തും

ന്യൂഡല്‍ഹി | കൊവിഡ് 19 പ്രതിരോധ പ്രവര്‍ത്തനങ്ങളുടെ നിലവിലെ സ്ഥിതിഗതികള്‍ വിലയിരുത്തുന്നതിനായി പ്രധാനമന്ത്രി നരേന്ദ്ര മോദി സംസ്ഥാന മുഖ്യമന്ത്രിമാരുടെ യോഗം വിളിച്ചു. ഏപ്രില്‍ 27 നാണ് പ്രധാന മന്ത്രി വീഡിയോ കോണ്‍ഫറന്‍സിലൂടെ മുഖ്യമന്ത്രിമാരുമായി ചര്‍ച്ച നടത്തുക. രാജ്യത്ത് ലോക്ക് ഡൗണ്‍ ഏര്‍പ്പെടുത്തിയ ശേഷം രണ്ട് തവണ വീഡിയോ കോണ്‍ഫറസിലൂടെ പ്രധാനമന്ത്രി സാഹചര്യങ്ങള്‍ വിലയിരുത്തിയിരുന്നു. വിമാന സര്‍വീസ് പുനരാരംഭിക്കുന്നതുള്‍പ്പെടെയുള്ള വിഷയങ്ങളില്‍ മുഖ്യമന്ത്രിമാരുടെ അഭിപ്രായം പ്രധാനമന്ത്രി അന്വേഷിക്കുമെന്നും സൂചനയുണ്ട്.

24 മണിക്കൂറിനുള്ളില്‍ 1486 പേര്‍ക്ക് കൂടി കൊവിഡ് സ്ഥിരീകരിച്ചതോടെ ഇന്ത്യയിലെ വൈറസ് ബാധിതരുടെ ആകെ എണ്ണം 20471 ആയി. 652 ആണ് മരണം. ഇന്ന് മാത്രം 49 പേര്‍ മരിച്ചു.