മഠത്തില്‍ പട്ടിണിക്കിട്ട് കൊല്ലാന്‍ ശ്രമമെന്ന് സിസ്റ്റര്‍ ലൂസി കളപ്പുര

കോഴിക്കോട് |  സഭാ നേതൃത്വത്തിനെതിരെ ഗുരുതര ആരോപണവുമായി സിസ്റ്റര്‍ ലൂസി കളപ്പുര. ഭക്ഷണം പോലും നല്‍കാതെ തന്നെ മഠത്തിനുള്ളില്‍ ഒറ്റപ്പെടുത്തി പീഡിപ്പിക്കുന്നതായി സിസ്റ്റര്‍ ലൂസി കളപ്പുര പറയുന്നു.

കഴിഞ്ഞ ഒന്നര മാസമായി നിരന്തര പീഡനത്തിന് ഇരയാകുന്നു. പട്ടിണിക്കിട്ട് കൊല്ലാനാണ് നീക്കം. പലവട്ടം മഠത്തില്‍ നിന്ന് ഇറങ്ങിപോകാന്‍ ആവശ്യപ്പെട്ടു. സഭാ വസ്ത്രം ഉപേക്ഷിക്കണമെന്ന് ആവശ്യപ്പെട്ട് ഭീഷണിപ്പെടുത്തുന്നു. മഠത്തില്‍ നിന്ന് തന്നോട് സംസാരിക്കുന്നത് പോലും മറ്റുള്ളവരെ സഭാ നേതൃത്വം ഇടപെട്ട് വിലക്കുന്നു. ഇന്ന് ഉച്ചയോടെ വാര്‍ത്താസമ്മേളനം വിളിച്ച് എല്ലാം പുറത്ത് പറയുമെന്നും ഒരു സ്വകാര്യ ചാനലിന് അനുവദിച്ച അഭിമുഖത്തില്‍ സിസ്റ്റര്‍ ലൂസി പറഞ്ഞു.

കന്യാസ്ത്രീയെ പീഡിപ്പിച്ച ബിഷപ്പ് ഫ്രാങ്കോ മുളക്കലിനെതിരായ സമരത്തില്‍ പങ്കെടുത്തതോടെയണ് സിസ്റ്റര്‍ ലൂസി കളപ്പുര സഭക്ക് അനഭിമതയായത്. തുടര്‍ന്ന് മാനന്തവാടിയിലെ മഠത്തിലും മറ്റുമായി നിരന്തര ആക്രമണത്തിന് ഇവര്‍ ഇരയായി. മഠത്തില്‍ നിന്ന് ഇറക്കിവിടാനുള്ള ശ്രമം കോടതി ഇടപെട്ട് തടയുകയായിരുന്നു.

സഭാ നേതൃത്വത്തിനുള്ളില്‍ നടക്കുന്ന അനാചാരങ്ങളും കന്യാസ്ത്രീകള്‍ക്കെതിരായുള്ള ചൂഷണവും ചൂണ്ടിക്കാട്ടി ലൂസി കളപ്പുരയുടെ ആത്മകഥ പുറത്തിറങ്ങിയതും സഭയുടെ എതിര്‍പ്പ് ശക്തമാക്കിയിരുന്നു. സഭാ നേതൃത്വം തനിക്കെതിരായി നടത്തുന്ന പ്രചാരണങ്ങള്‍ ചൂണ്ടിക്കാടി ലൂസി വത്തിക്കാന് പരാതി നല്‍കിയെങ്കിലും തള്ളുകയായിരുന്നു.