കാണിക്കയില്‍നിന്നും പണം അപഹരിച്ച സ്‌പെഷല്‍ ഓഫീസറെ സസ്‌പെന്‍ഡ് ചെയ്തു

തിരുവനന്തപുരം | കാണിക്കയില്‍നിന്നും പണം മോഷ്ടിച്ചുവെന്ന പരാതിയെത്തുടര്‍ന്ന് പമ്പയില്‍ സ്‌പെഷല്‍ ഓഫീസറായിരുന്ന ജെ വി ബാബുവിനെ തിരുവതാംകൂര്‍ ദേവസ്വം ബോര്‍ഡ് സസ്‌പെന്‍ഡ് ചെയ്തു. പരാതി സംബന്ധിച്ച് വിശദമായി അന്വേഷണം നടത്താനും യോഗത്തില്‍ ധാരണയായി.

മണ്ഡലകാല ഉത്സവത്തിന്റെ ഭാഗമായി ഉള്ളൂര്‍ ഗ്രൂപ്പിലെ അസിസ്റ്റന്റ് ദേവസ്വം കമ്മീഷണര്‍ ജെ വി ബാബുവിനെ സ്‌പെഷ്യല്‍ ഓഫീസറായി പമ്പയില്‍ നിയോഗിച്ചിരുന്നു. ഓപ്പണ്‍ കാണിക്കയില്‍ നിന്ന് പണം മോഷ്ടിച്ചുവെന്ന ആരോപണത്തെ തുടര്‍ന്ന് ബാബുവിനെ നിയമിച്ച ഉത്തരവ് പിന്നീട് ബോര്‍ഡ് റദ്ദാക്കിയിരുന്നു.

ജെ വി ബാബുവിനെതിരെ ക്രിമിനല്‍ കേസ് രജിസ്റ്റര്‍ ചെയ്ത് നിയമനടപടി സ്വീകരിക്കാന്‍ പത്തനംതിട്ട എസ് പിയോട് ആവശ്യപ്പെടാന്‍ തീരുമാനിച്ചതായി ബോര്‍ഡ് പ്രസിഡന്റ് അഡ്വ.എന്‍ വാസു അറിയിച്ചു.