Malappuram
പൊന്നാനിയിൽ സ്ഥാനാർഥികൾ തിരക്കിലേക്ക്
തിരൂർ: പ്രചാരണ പ്രവർത്തനങ്ങൾ ഊർജിതമാക്കാനായി താഴെത്തട്ടിലെ കാര്യങ്ങൾ അന്വേഷിച്ചും കൺവെൻഷനുകളിൽ ഓടിയെത്തിയും സ്ഥാനാർഥികൾ കൂടുതൽ തിരക്കിലേക്ക്. പൊന്നാനി ലോക്സഭാ മണ്ഡലം യു ഡി എഫ് സ്ഥാനാർഥി ഇ ടി മുഹമ്മദ് ബശീറും എൽ ഡി എഫ് സ്ഥാനാർഥി പി വി അൻവറും വീറും വാശിയോടെയും തന്നെയാണ് ഓരോ ദിനവും തള്ളിനീക്കുന്നത്. വിവാദ വിഷയങ്ങളും പഴയകാല സംഭവവികാസങ്ങളും എടുത്തിട്ട് സാമൂഹിക മാധ്യമങ്ങളിലും ചർച്ചയാക്കുന്നു.
തവനൂർ നിയോജക മണ്ഡലത്തിലെ പഴയ സൗഹൃദങ്ങൾ പുതുക്കിയും സ്കൂളുകളിലെത്തി കുട്ടികളെ കണ്ടുമാണ് ഇന്നലെ ഇ ടി മുഹമ്മദ് ബശീർ പര്യടനത്തിന് തുടക്കമിട്ടത്. തൃപ്രങ്ങോട് പഞ്ചായത്തിലെ രോഗം കാരണം വിശ്രമിക്കുന്നവരെയും ഇ ടി സന്ദർശിച്ചു. കൺവെൻഷനുകളിൽ സജീവമായി ഇടതുപക്ഷത്തിന്റെ രാഷ്ട്രീയ പ്രസക്തിയും നിലപാടും വ്യക്തമാക്കുകയായിരുന്നു ഇന്നലെ എൽ ഡി എഫ് സ്ഥാനാർഥി അൻവർ. താനൂർ, തിരൂർ എന്നിവിടങ്ങളിലെ കൺവെൻഷനിൽ നിരവധി പ്രവർത്തകരാണ് പങ്കെടുത്തത്്.
ലീഗിന്റെ എസ് ഡി പി ഐ നേതാക്കളുമായുള്ള ചർച്ചയെ ചൊല്ലിയുള്ള വിവാദമാണ് മിക്കയിടത്തും മുഴച്ചുനിന്നത്. താനൂർ മണ്ഡലത്തിലെ മുഴുവൻ പഞ്ചായത്ത്് മേഖലാ തല കൺവെൻഷനുകൾ ഇന്നാണ് നടക്കുക.