പ്രവാസി ഇന്ത്യക്കാരുടെ അഭിപ്രായം തേടി ഗ്ലോബല്‍ മാനിഫെസ്റ്റോ മീറ്റ്‌

Posted on: February 24, 2019 8:46 pm | Last updated: February 24, 2019 at 8:46 pm

ദുബൈ: ഇന്ത്യന്‍ നാഷണല്‍ കോണ്‍ഗ്രസിന്റെ പ്രവാസി വിഭാഗമായ, ഇന്ത്യന്‍ ഓവര്‍സീസ് കോണ്‍ഗ്രസിന്റെ ഗ്ലോബല്‍ മാനിഫെസ്റ്റോ മീറ്റ് ദുബൈയില്‍ സമാപിച്ചു. രണ്ടു ദിവസത്തെ സമ്മേളനത്തില്‍ പത്തോളം രാജ്യങ്ങളിലെ 180 പ്രതിനിധികള്‍ പങ്കെടുത്തു. ‘മഹാത്മാഗാന്ധി 150 വര്‍ഷങ്ങള്‍- ഇന്ത്യന്‍ കാഴ്ചപാട് ‘ എന്ന വിഷയത്തില്‍ നടന്ന പരിപാടിയില്‍, ഐ ഒ സിയുടെ, ഗ്‌ളോബല്‍ ചെയര്‍മാന്‍ ഡോ. സാം പിത്രോഡ മുഖ്യാതിഥിയായി. പാര്‍ട്ടി മാനിഫെസ്റ്റോ, പീപ്പിള്‍സ് മാനിഫെസ്റ്റോ ആക്കുക എന്ന ലക്ഷ്യത്തിലാണിതെന്ന് സാം പിത്രോഡ പറഞ്ഞു.

രാഹുല്‍ ഗാന്ധി, കോണ്‍ഗ്രസ് അധ്യക്ഷന്‍ ആയതിന് ശേഷം നടക്കുന്ന, ആദ്യ ലോകസഭാ തിരഞ്ഞെടുപ്പിന്റെ മുന്നോടിയായിട്ടായിരുന്നു സമ്മേളനം. ഇപ്രകാരം, കോണ്‍ഗ്രസ് പാര്‍ട്ടിയുടെ പ്രകടന പത്രികയില്‍, പ്രവാസി ഇന്ത്യക്കാരുടെ നിര്‍ദേശങ്ങളും അഭിപ്രായങ്ങളും ഉള്‍പ്പെടുത്തുന്നതിന്റെ ഭാഗമായാണ് ഇത്തരത്തില്‍ രണ്ടു ദിവസത്തെ സമ്മേളനം സംഘടിപ്പിച്ചത്. അമേരിക്ക, യൂറോപ്പ്, ലണ്ടന്‍, ജര്‍മ്മനി, ഇറ്റലി മിഡില്‍ ഈസ്റ്റ് എന്നീ മേഖലകളില്‍ നിന്നുള്ള ക്ഷണിക്കപ്പെട്ട സ്ത്രീകള്‍ ഉള്‍പ്പടെയുള്ള പ്രതിനിധികള്‍ തങ്ങളുടെ കാഴ്ചപാടുകളും അഭിപ്രായങ്ങളും നിര്‍ദേശങ്ങളും ഒരു കുടക്കീഴില്‍ അവതരിപ്പിച്ചു.
ഇന്ത്യന്‍ ഓവര്‍സീസ് കോണ്‍ഗ്രസ് , ഇന്‍കാസ്, ഒ ഐ സി സി എന്നിവയ്ക്ക് പുറമേ, കെ എം സി സി പോലുള്ള കോണ്‍ഗ്രസ് അനുഭാവ പ്രവാസി സംഘടനകളുടെ പ്രതിനിധികളും ഇതില്‍ പങ്കെടുത്തു. വിവിധ വിഷയങ്ങളില്‍ സബ് കമ്മിറ്റികള്‍ രൂപീകരിച്ച് ചര്‍ച്ചകള്‍ നടത്തി. തുടര്‍ന്ന് ഈ കമ്മിറ്റികളുടെ ചുമതലക്കാര്‍ അഭിപ്രായങ്ങള്‍ സ്വരൂപിച്ച് വിഷയമായി അവതരിപ്പിച്ചു. കോണ്‍ഗ്രസ് പാര്‍ട്ടി മാര്‍ച്ച് മാസത്തില്‍ പുറത്തിറക്കുന്ന പ്രകടന പത്രികയില്‍ ഇത്തരം നിര്‍ദേശങ്ങള്‍ ഉള്‍പ്പെടുത്തും.

എ ഐ സി സി മാനിഫെസ്റ്റോ കണ്‍വീനര്‍ രാജീവ് ഡൗഡ എം പി, എ ഐ സി സി സെക്രട്ടറിമാരായ ഹിമാന്‍ഷു വ്യാസ്, മധു യാസ്‌കി , ഡോ. ആസാദ് മൂപ്പന്‍, ഇന്‍കാസ് യുഎഇ പ്രസിഡന്റ് മഹാദേവന്‍ വാഴശേരിയില്‍ തുടങ്ങിയ നിരവധി പേര്‍ സംസാരിച്ചു.