Ongoing News
വിയ്യൂര്‍ സെന്‍ട്രല്‍ ജയിലിലെ ആറ് വാര്‍ഡന്‍മാര്‍ക്കെതിരെ ജയില്‍ ഡി ഐ ജി റിപ്പോര്‍ട്ട് നല്‍കി
തൃശൂര്‍: വിയ്യൂര്‍ സെന്‍ട്രല്‍ ജയിലിലെ ആറ് വാര്‍ഡര്‍മാര്‍ക്കെതിരെ ജയില്‍ ഡി ഐ ജിയുടെ റിപ്പോര്‍ട്ട്. ടി പി കൊലക്കേസിലെ പ്രതികള്‍ക്ക് മൊബൈല്‍ ഉപയോഗിക്കാന്‍ വാര്‍ഡര്‍മാര്‍ ഒത്താശ ചെയ്തുകൊടുത്തുവെന്ന് റിപ്പോര്‍ട്ടില്‍ പറയുന്നു. ജയില്‍ ഡി ജി പി. ടി പി സെന്‍കുമാറിനാണ് മധ്യമേഖലാ ജയില്‍ ഡി ഐ ജി രാധാകൃഷ്ണന്‍ റിപ്പോര്‍ട്ട് സമര്‍പ്പിച്ചിട്ടുള്ളത്. ഇതുമായി ബന്ധപ്പെട്ട് ജയില്‍ ജീവനക്കാരില്‍ നിന്ന് ഡി ഐ ജി. മൊഴിയെടുത്തിരുന്നു.
ടി പി കൊലക്കേസിലെ പ്രതികള്‍ ജയില്‍ ജീവനക്കാരുടെ ഒത്താശയോടെയാണ് വിയ്യൂര്‍ സെന്‍ട്രല്‍ ജയിലില്‍ മൊബൈല്‍ ഫോണ്‍ ഉപയോഗിച്ചിരുന്നതെന്ന് പോലിസ് രഹസ്യാന്വേഷണ വിഭാഗം നേരത്തെ തന്നെ കണ്ടെത്തിയിരുന്നു. ജയിലിലെ സി സി ടി വി ക്യാമറകളും വൈദ്യുത വിളക്കുകളും തകരാറിലായതിന് പിന്നില്‍ ജയില്‍ ജീവനക്കാരുടെ കൈകളുള്ളതായും രഹസ്യാന്വേഷണ വിഭാഗം സംശയിക്കുന്നുണ്ട്. കഴിഞ്ഞ വര്‍ഷം ജയിലിലെ ക്യാമറകള്‍ തകരാറിലാണെന്ന് പരാതി ഉയര്‍ന്നപ്പോള്‍ പരിഹരിക്കുമെന്ന് ജയില്‍ അധികൃതര്‍ അറിയിച്ചിരുന്നു. പിന്നീട് ടി പി കൊലക്കേസ് പ്രതികള്‍ക്ക്് നേരെ മര്‍ദനമുണ്ടായെന്ന ആക്ഷേപമുണ്ടായപ്പോഴും സി സി ടി വി തകരാറിലായിരുന്നു.
എന്നാല്‍ പിന്നീട് ജയില്‍ സന്ദര്‍ശിച്ച ഡി ജി പി സെന്‍കുമാര്‍ സി സി ടി വി ക്യാമറകളുടെ തകരാര്‍ ഉടന്‍ പരിഹരിക്കുമെന്ന് ഉറപ്പ് നല്‍കിയിരുന്നുവെങ്കിലും നടപടി ഉണ്ടായില്ല. ഏറെ കോളിളക്കമുണ്ടാക്കിയ കൊലക്കേസ് പ്രതികളെ പാര്‍പ്പിച്ചിട്ടും ജയിലിലെ 67 സി സി ടി വി ക്യാമറകളുടെയും തകരാര്‍ പരിഹരിക്കാതിരുന്നത്് പ്രതികളും ജയില്‍ ജീവനക്കാരും തമ്മിലുള്ള ബന്ധമാണ് വ്യക്തമാക്കുന്നതെന്നായിരുന്നു രഹസ്യാന്വേഷണ വിഭാഗത്തിന്റെ കണ്ടെത്തല്‍. നേരത്തെ ടി പി കൊലക്കേസിലെ പ്രതികളെ പാര്‍പ്പിച്ചിരിക്കുന്ന സെല്ലില്‍ നിന്നും അഞ്ച് മൊബൈല്‍ ഫോണുകളും സിം കാര്‍ഡും ഇയര്‍ ഫോണും ജയില്‍ അധികൃതര്‍ പിടിച്ചെടുത്തിരുന്നു.
Latest
90ഓളം വിമാനങ്ങള്‍ റദ്ദാക്കി; എയര്‍ ഇന്ത്യ എക്‌സ്പ്രസിനോട് റിപ്പോര്‍ട്ട് തേടി സിവില്‍ ഏവിയേഷന്‍ മന്ത്രാലയം
റോഡ് നിര്‍മാണ അഴിമതിക്കേസ്; കോണ്‍ട്രാക്ടര്‍ക്കും എഞ്ചിനിയര്‍മാര്‍ക്കും കഠിന തടവും പിഴയും ശിക്ഷ
പ്ലസ് വണ്‍ പ്രവേശനം: മെയ് 16 മുതല്‍ അപേക്ഷിക്കാം, ട്രയല്‍ അലോട്ട്‌മെന്റ് 29ന്
ലിവ് -ഇന്‍ ബന്ധം ഇന്ത്യന്‍ സംസ്‌കാരത്തിന് കളങ്കമെന്ന് ഛത്തീസ്ഗഡ് ഹൈക്കോടതി
വീട്ടുജോലിക്കെത്തി 7ലക്ഷം രൂപയും 2 കോടി വിലമതിക്കുന്ന വജ്ര സ്വര്‍ണാഭരണങ്ങളും കവര്‍ന്നു ;പ്രതികൾ പിടിയില്‍
പെരിയ ഇരട്ടക്കൊലക്കേസ് പ്രതിയുടെ വിവാഹ ചടങ്ങില്‍ കോണ്‍ഗ്രസ്സ് നേതാവ്; വിവാദം
