മുക്കുപണ്ടം പണയം വെച്ച ശേഷം മരിച്ചെന്ന് വാര്‍ത്ത നല്‍കി രക്ഷപ്പെട്ടയാള്‍ പിടിയില്‍

കോട്ടയം | മുക്കുപണ്ടം പണയം വെച്ച ശേഷം മരിച്ചെന്ന് സ്വയം വാര്‍ത്ത നല്‍കി രക്ഷപ്പെട്ട കോട്ടയം സ്വദേശി തമിഴ്‌നാട്ടില്‍ പിടിയില്‍. കോട്ടയം കുമാരനല്ലൂര്‍ സ്വദേശി സജീവ് എം ആറിനെയാണ് ഗാന്ധിനഗര്‍ പോലീസ് പിടികൂടിയത്.

2024ലെ കേസിലാണ് ഗാന്ധിനഗര്‍ പോലീസ് ഇയാളെ അറസ്റ്റ് ചെയ്തത്. കോട്ടയം കുമാരനെല്ലൂരിലെ സ്വകാര്യ പണമിടപാട് സ്ഥാപനത്തില്‍ നിന്ന് നാല് തവണകളായി സ്വര്‍ണം പണയം വെച്ച് 4,39,000 രൂപ പ്രതി വാങ്ങിയിരുന്നു. പിന്നീട് തമിഴ്നാട്ടിലേക്ക് മുങ്ങി. ഇതിനുമുന്നേ മരിച്ചെന്ന് പത്രത്തില്‍ വാര്‍ത്തയും കൊടുത്തു.

എന്നാല്‍ ഇതിന് ശേഷവും ഇയാളുടെ നമ്പറില്‍ നിന്ന് ഭാര്യയുടെ ഫോണിലേക്ക് കോളുകള്‍ വന്നതോടെ പോലീസ് തമിഴ്നാട്ടിലേക്ക് അന്വേഷണം വ്യാപിപ്പിച്ചു. ഒടുവില്‍ കൊടേക്കനാലില്‍ നിന്ന് പ്രതിയെ പോലീസ് പിടികൂടുകയായിരുന്നു.