അഹമ്മദാബാദ് വിമാന അപകടം: എൻ ഐ എ അന്വേഷണം തുടങ്ങി; ബ്ലാക് ബോക്സ് കണ്ടെടുത്തത് നിർണായകം

ന്യൂഡൽഹി | അഹമ്മദാബാദിൽ എയർ ഇന്ത്യയുടെ ബോയിംഗ് 787 ഡ്രീംലൈനർ വിമാനം തകർന്നുവീണ സംഭവത്തിൽ ദേശിയ അന്വേഷണ ഏജൻസി (എൻ ഐ എ) അന്വേഷണം തുടങ്ങി. എൻ ഐ എ സംഘങ്ങളും മറ്റു ഏജൻസികളും സംഭവസ്ഥലം സന്ദർശിച്ച് പ്രാഥമിക പരിശോധന നടത്തി. കേന്ദ്ര വ്യോമയാന മന്ത്രാലയത്തിന്റെ ടീമുകളെ സഹായിക്കാൻ ഗുജറാത്ത് സർക്കാരിൽ നിന്നുള്ള ഏകദേശം 40 ജീവനക്കാരും രംഗത്തുണ്ട്. എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോയും (AAIB) ഉടനടി അന്വേഷണം ആരംഭിച്ചിട്ടുണ്ട്.

വിമാനത്തിന്റെ രണ്ട് ബ്ലാക് ബോക്സുകളിൽ ഒന്ന് ബി.ജെ. മെഡിക്കൽ കോളേജിന്റെ റെസിഡൻഷ്യൽ ക്വാർട്ടേഴ്സിന്റെ മട്ടുപ്പാവിൽ നിന്ന് കണ്ടെടുത്തിട്ടുണ്ട്. ഇതിൽ നിന്നുള്ള വിവരങ്ങൾ അന്വേഷണത്തിൽ നിർണായകമാകും. പറക്കലിനിടെ വിമാനത്തെക്കുറിച്ചുള്ള വിവരങ്ങൾ രേഖപ്പെടുത്തുന്ന ഉപകരണമാണ് ബ്ലാക്ക് ബോക്സ്. കോക്ക്പിറ്റിലെ ശബ്ദങ്ങളും പൈലറ്റുമാർ തമ്മിലുള്ള സംഭാഷണങ്ങളും രേഖപ്പെടുത്തുന്ന കോക്ക്പിറ്റ് വോയിസ് റെക്കോർഡറും (CVR), ഉയരം, വേഗത, പറക്കുന്ന ദിശ തുടങ്ങിയ 80 തരം വിവരങ്ങൾ രേഖപ്പെടുത്തുന്ന ഡി.എഫ്.ഡി.ആറും ഇതിൽ ഉൾപ്പെടുന്നു.

സാധാരണയായി, സ്റ്റീൽ അല്ലെങ്കിൽ ടൈറ്റാനിയം കൊണ്ട് നിർമ്മിച്ച് കടുത്ത ചൂടിൽ നിന്നും തണുപ്പിൽ നിന്നും സംരക്ഷിക്കപ്പെട്ട ബ്ലാക്ക് ബോക്സിലെ വിവരങ്ങൾ വിശകലനം ചെയ്യാൻ വിദഗ്ധർക്ക് രണ്ടാഴ്ചയോളം എടുക്കും. സി.വി.ആറിനെക്കുറിച്ച് ഇതുവരെ ഒരു വിവരവും ലഭ്യമല്ല. ബ്ലാക്ക് ബോക്സ് എന്ന് പേരുണ്ടെങ്കിലും, ഇത് ഓറഞ്ച് അല്ലെങ്കിൽ മഞ്ഞ നിറത്തിൽ ചതുരാകൃതിയിലാണ് കാണപ്പെടുന്നത്.

ഇന്റർനാഷണൽ സിവിൽ ഏവിയേഷൻ ഓർഗനൈസേഷൻ (ICAO) നിശ്ചയിച്ചിട്ടുള്ള അന്താരാഷ്ട്ര പ്രോട്ടോക്കോളുകൾക്ക് അനുസരിച്ചാണ് AAIB അന്വേഷണം നടത്തുന്നത്. 2012-ൽ സ്ഥാപിതമായ AAIB, അപകടങ്ങളെയും ഗുരുതരമായ സംഭവങ്ങളെയും കുറിച്ച് അന്വേഷിക്കുന്ന ഒരു സ്വതന്ത്ര സ്ഥാപനമാണ്. ഇന്ത്യൻ വ്യോമാതിർത്തിയിൽ പ്രവർത്തിക്കുന്ന വിമാനങ്ങളുമായി ബന്ധപ്പെട്ട സുരക്ഷാ സംഭവങ്ങളെ അപകടങ്ങളായും ഗുരുതരമായ സംഭവങ്ങളായും തരംതിരിക്കുന്നതിനുള്ള ഉത്തരവാദിത്തം ഇതിനുണ്ട്.

വിമാന (അപകടങ്ങളും സംഭവങ്ങളും അന്വേഷണം) നിയമങ്ങൾ, 2017 ലെ റൂൾ 3 അനുസരിച്ച്, AAIB നടത്തുന്ന അന്വേഷണങ്ങളുടെ ഏക ലക്ഷ്യം അപകടങ്ങളും സംഭവങ്ങളും തടയുക എന്നതാണ്, അല്ലാതെ കുറ്റം ചുമത്തുകയോ ഉത്തരവാദിത്തം നിർണ്ണയിക്കുകയോ അല്ല. ഭാവിയിൽ ഇത്തരം അപകടങ്ങൾ തടയുന്നതിനും വ്യോമയാന സുരക്ഷ ശക്തിപ്പെടുത്തുന്നതിനും ഒരു ഉന്നതതല സമിതി രൂപീകരിക്കുമെന്നും സർക്കാർ പ്രഖ്യാപിച്ചിട്ടുണ്ട്.

വ്യാഴാഴ്ച ഉച്ചയ്ക്ക് അഹമ്മദാബാദ് വിമാനത്താവളത്തിൽ നിന്ന് പറന്നുയർന്നതിന് തൊട്ടുപിന്നാലെ ലണ്ടൻ ഗാറ്റ്‌വിക്കിലേക്ക് പോവുകയായിരുന്ന ബോയിംഗ് 787-8 ഡ്രീംലൈനർ തകരുകയും വിമാനത്തിലുണ്ടായിരുന്ന 242 പേരിൽ ഒരാളൊഴികെ എല്ലാവരും മരിക്കുകയുമായിരന്നു.

വ്യാഴാഴ്ച രാത്രി കേന്ദ്ര ആഭ്യന്തര മന്ത്രി അമിത് ഷാ ആശുപത്രിയിൽ പരിക്കേറ്റവരെ സന്ദർശിച്ചു. പ്രധാനമന്ത്രി നരേന്ദ്ര മോദി അപകടസ്ഥലം സന്ദർശിക്കുകയും ആശുപത്രിയിൽ പരിക്കേറ്റവരെ കാണുകയും ചെയ്തു.