അതിവിശാല ഷോപ്പിംഗ് അനുഭവവുമായി അബു സിദ്ര ലുലു ഹൈപ്പർ മാർക്കറ്റ്

ദോഹ/ അബുദാബി | ലുലു ഗ്രൂപ്പിൻ്റെ  ഏറ്റവും പുതിയ  ഹൈപ്പർമാർക്കറ്റ് ഖത്വറിൽ പ്രവർത്തനമാരംഭിച്ചു. ദോഹ  അബു സിദ്രയിലെ അബു സിദ്ര മാളിലാണ് ഗ്രൂപ്പിൻ്റെ 215ാമതും  ഖത്വറിലെ  പതിനഞ്ചാമത്തെതുമായ  ലുലു ഹൈപ്പർമാർക്കറ്റ്. ലുലു ഗ്രൂപ്പ് ചെയർമാൻ എം എ യൂസഫലിയുടെ സാന്നിധ്യത്തിൽ  വ്യവസായ പ്രമുഖൻ  ശൈഖ് ജാസിം മുഹമ്മദ് അൽ താനി, ഹുസൈൻ ഇബ്രാഹിം അൽ അൻസാരി, ഖത്വറിലെ ഇന്ത്യൻ സ്ഥാനപതി ദീപക് മിത്തൽ എന്നിവർ ചേർന്ന് ഉദ്ഘാടനം നിർവഹിച്ചു.

2,50,000ലധികം  ചതുരശ്രയടി വിസ്തീർണത്തിലുള്ള അതിവിശാലമായ ഹൈപ്പർ മാർക്കറ്റിൽ ആധുനിക രൂപകല്പനയിലുള്ള ന്യൂട്രൽ കളർ ഫിക്സ്ചറുകൾ, സമകാലികമായ  ശൈലി, ഏറ്റവും മികച്ച വെളിച്ച സംവിധാനം  തുടങ്ങിയവ സംയോജിപ്പിച്ചാണ് ഉപഭോക്താക്കൾക്കായി ഒരുക്കിയിട്ടുള്ളത്. ഉപഭോക്താക്കൾക്കായി അതിവിശാലവും വിപുലവുമായ ഷോപ്പിംഗ് അനുഭവം  നൽകാൻ സാധിച്ചതിൽ സന്തോഷമുണ്ടെന്ന് എം എ യൂസഫലി പറഞ്ഞു.  ഗൾഫ് രാജ്യങ്ങൾ  കൊവിഡിൻ്റെ വെല്ലുവിളികൾ അതിജീവിച്ച്  വ്യാപാര- വാണിജ്യ രംഗങ്ങളടക്കം എല്ലാ മേഖലകളും  പുത്തനുണർവിനിൻ്റെ  പാതയിലാണ്. ഇത്  ഗൾഫ് ഭരണാധികാരികളുടെ  ഭരണനേതൃത്വത്തിൻ്റെ വിശാലമായ കാഴ്ചപ്പാടിൻ്റെ ഫലമായാണെന്നും യൂസഫലി പറഞ്ഞു.

ഭക്ഷ്യവസ്തുക്കൾ ഒട്ടും തന്നെ പാഴാക്കാതെയുള്ള സീറോ വേസ്റ്റ് റീഫിൽ സ്റ്റേഷൻ, പ്രശസ്തരായ പാചക വിദഗ്ധർ നേരിട്ട് ക്ലാസ്സുകൾ എടുക്കുന്ന ലുലു കുക്കിംഗ്  സ്കൂൾ, സവിശേഷമായ തേനുകൾ ലഭ്യമാകുന്ന ഹണി സ്റ്റേഷൻ,  മാംസ ഗുണത്തിന് തുല്യമായ സസ്യോൽപ്പന്നങ്ങളിലൂടെ മാംസ രഹിത ഭക്ഷണത്തിന് പ്രത്യേക പ്രാധാന്യം നൽകിയുള്ള വെഗൻ ബുച്ചറി സ്റ്റേഷൻ – Planet Y എന്നിവ അബു സിദ്ര ലുലു ഹൈപ്പർമാർക്കറ്റിലെ പ്രത്യേകതകളാണ്. വെഗാൻ ബുച്ചറി സ്റ്റേഷൻ ആരംഭിക്കുന്ന ആദ്യത്തെ ഹൈപ്പർ മാർക്കറ്റ് കൂടിയാണിത്. ഇത്‌ കൂടാതെ രണ്ടായിരത്തിലധികം വാഹനങ്ങൾക്ക് പാർക്കിംഗ് സൗകര്യമുള്ള അതിവിശാലമായ ഹൈപ്പർ മാർക്കറ്റ് എന്ന പ്രത്യേകതയുമുണ്ട്.

ലുലു ഗ്രൂപ്പ് എക്സിക്യൂട്ടീവ് ഡയറക്ടർ എം എ അഷ്റഫ് അലി, ലുലു ഗ്രൂപ്പ് ഡയറക്ടർ മുഹമ്മദ് അൽത്താഫ്, ലുലു എക്സ്ചേഞ്ച് സി ഇ ഒ അദീബ് അഹമ്മദ്.  ലുലു ഖത്വർ റീജിയണൽ ഡയറക്ടർ എം ഒ ഷൈജൻ ചടങ്ങിൽ സംബന്ധിച്ചു.