Covid19
ഒരു ദിവസം 4.5 ലക്ഷം ഡോസ് വാക്സിൻ നൽകി കേരളം; വാക്സിൻ ലഭിച്ചാൽ നല്ല നിലയിൽ നൽകുമെന്ന് തെളിയിച്ചുവെന്ന് ആരോഗ്യ മന്ത്രി
തിരുവനന്തപുരം | ഒറ്റ ദിവസം കൊണ്ട് നാലര ലക്ഷം ഡോസ് വാക്സിന് നല്കിയെന്നും വാക്സീന് ലഭിച്ചാല് ഏറ്റവും നന്നായി കൊടുത്തു തീര്ക്കും എന്ന് കേരളം ഒരിക്കല് കൂടി തെളിയിച്ചിരിക്കുകയാണെന്നും ആരോഗ്യ മന്ത്രി വീണാ ജോർജ്. വെള്ളിയാഴ്ച വൈകുന്നേരം ലഭിച്ച രണ്ട് ലക്ഷം ഡോസ് വാക്സീനും ചേര്ത്ത് ഇന്ന് രാവിലെ സ്റ്റോക്കുണ്ടായിരുന്നത് 6,02,980 ഡോസ് ആയിരുന്നു. ഇന്ന് വന്ന 38,860 ഡോസ് കോവാക്സിന് ഉള്പ്പെടെ ഇനി സംസ്ഥാനത്ത് രണ്ട് ലക്ഷത്തോളം വാക്സിന് മാത്രമാണ് സ്റ്റോക്കുള്ളതെന്നും അവർ അറിയിച്ചു.
മികച്ച രീതിയില് വാക്സിന് നല്കുന്ന സംസ്ഥാനമാണ് കേരളം. ദേശീയ ശരാശരിയേക്കാള് കൂടുതലാണ് സംസ്ഥാനത്തെ വാക്സിനേഷന്. ആരോഗ്യ പ്രവര്ത്തകര്ക്കും മുന്നണി പേരാളികള്ക്കുമുള്ള ആദ്യ ഡോസ് വാക്സിനേഷന് 100 ശതമാനത്തിലെത്തിച്ചു. ഈ ആഴ്ച മാത്രം 16 ലക്ഷത്തോളം പേര്ക്കാണ് വാക്സിന് നല്കിയത്. ഇതോടെ ഒരു ദിവസം നാല് ലക്ഷത്തിന് മുകളില് വാക്സിന് നല്കാന് കഴിയുമെന്ന് സംസ്ഥാനം തെളിയിച്ചിരിക്കുകയാണ്.
ഇന്ന് 1,522 വാക്സിനേഷന് കേന്ദ്രങ്ങളാണ് പ്രവര്ത്തിച്ചത്. സര്ക്കാര് തലത്തില് 1,380 കേന്ദ്രങ്ങളും സ്വകാര്യതലത്തില് 142 കേന്ദ്രങ്ങളുമാണുണ്ടായിരുന്നത്. ഇന്ന് മൂന്ന് ജില്ലകളിൽ അര ലക്ഷത്തിലധികം പേര്ക്ക് വീതം വാക്സിന് നല്കി. 59,374 പേര്ക്ക് വാക്സിന് നല്കിയ കണ്ണൂര് ജില്ലയാണ് മുമ്പില്. 53,841 പേര്ക്ക് വാക്സിന് നല്കി തൃശൂര് ജില്ലയും 51,276 പേര്ക്ക് വാക്സിന് നല്കി കോട്ടയം ജില്ല തൊട്ട് പുറകിലുണ്ട്.
സംസ്ഥാനത്ത് ഇതുവരെ ഒന്നും രണ്ടും ഡോസ് ചേര്ത്ത് ആകെ 1,83,89,973 പേര്ക്കാണ് വാക്സിന് നല്കിയത്. അതില് 1,28,23,869 പേര്ക്ക് ഒന്നാം ഡോസ് വാക്സിനും 55,66,104 പേര്ക്ക് രണ്ടാം ഡോസ് വാക്സിനുമാണ് നല്കിയത്. 2011ലെ സെന്സസ് അനുസരിച്ച് ആകെ ജനസംഖ്യയുടെ 38.39 ശതമാനം പേര്ക്ക് ഒന്നാം ഡോസും 16.66 ശതമാനം പേര്ക്ക് രണ്ടാം ഡോസും നല്കിയിട്ടുണ്ട്. ഈ സെന്സസ് അനുസരിച്ച് 18 വയസിന് മുകളിലുള്ളവരുടെ ജനസംഖ്യയില് 53.43 ശതമാനം പേര്ക്ക് ഒന്നാം ഡോസും 23.19 ശതമാനം പേര്ക്ക് രണ്ടാം ഡോസും നല്കിയിട്ടുണ്ട്. ഇത് കേന്ദ്ര ശരാശരിയേക്കാള് വളരെ മുന്നിലാണെന്നും മന്ത്രി അറിയിച്ചു.