Covid19
സംസ്ഥാനത്ത് ആദ്യഘട്ടത്തില് വാക്സിനേഷന് സ്വീകരിച്ച് 93.84 ശതമാനം പേര്
തിരുവനന്തപുരം | സംസ്ഥാനത്ത് ആദ്യഘട്ട വാക്സിനേഷനില് വാക്സിന് സ്വീകരിച്ചത് 93.84 ശതമാനം പേര്. സര്ക്കാര്, സ്വകാര്യ മേഖലകളിലെ ആരോഗ്യ പ്രവര്ത്തകര്, ആശ, അങ്കണ്വാടി പ്രവര്ത്തകര് എന്നിവരാണ് ആദ്യ ഡോസ് സ്വീകരിച്ചത്. രണ്ട് പ്രാവശ്യം പേര് ചേര്ക്കപ്പെട്ടവര്, ഗര്ഭിണികള്, ആരോഗ്യ പ്രശ്നങ്ങളാല് വാക്സിന് എടുക്കുവാന് കഴിയാത്തവര്, വാക്സിന് നിരസിച്ചവര് എന്നിവരെ പട്ടികയില് നിന്നും ഒഴിവാക്കിയിരുന്നു. ഇവരെ ഒഴിവാക്കി ആകെ രജിസ്റ്റര് ചെയ്ത 3,57,797 പ്രവര്ത്തകരില് 3,35,754 പേരാണ് ഇതുവരെ വാക്സിന് സ്വീകരിച്ചതെന്ന് ആരോഗ്യ വകുപ്പ് മന്ത്രി കെ കെ ശൈലജ അറിയിച്ചു. രജിസ്റ്റര് ചെയ്തതിന് ശേഷം എന്തെങ്കിലും കാരണത്താല് വാക്സിന് എടുക്കാന് കഴിയാതിരുന്ന ആരോഗ്യ പ്രവര്ത്തകര് ഉടന് തന്നെ വാക്സിന് സ്വീകരിക്കണമെന്ന് മന്ത്രി നിര്ദേശിച്ചു.
കോട്ടയം, പത്തനംതിട്ട, മലപ്പുറം ജില്ലകളില് രജിസ്റ്റര് ചെയ്ത എല്ലാ ആരോഗ്യ പ്രവര്ത്തകരും വാക്സിന് സ്വീകരിച്ചു. പാലക്കാട് 99.11 ശതമാനം, വയനാട് 98.88, കൊല്ലം 99.01 എന്നിങ്ങനെയാണ് മറ്റ് ജില്ലകളിലെ കണക്ക്. ആദ്യ ഘട്ടത്തില് ആദ്യ ഡോസ് വാക്സിന് എടുത്തവര്ക്ക് രണ്ടാമത്തെ ഡോസ് വാക്സിന് നല്കാന് തുടങ്ങിയിട്ടുണ്ട്. സംസ്ഥാനത്ത് ഇതുവരെ 3,35,754 ആരോഗ്യ പ്രവര്ത്തകരും 50,151 കൊവിഡ് മുന്നണി പോരാളികളുമാണ് വാക്സിന് സ്വീകരിച്ചത്. രണ്ട് വിഭാഗങ്ങളിലായി ഇതുവരെ ആകെ 3,85,905 പേരാണ് വാക്സിന് സ്വീകരിച്ചത്. 129 വാക്സിനേഷന് കേന്ദ്രങ്ങളിലാണ് ഇന്നലെ വാക്സിന് കുത്തിവെപ്പ് നടന്നത്. രണ്ടാം ഘട്ടത്തില് വാക്സിനേഷന് സ്വീകരിക്കുന്ന പോലീസ്, സൈന്യം, കേന്ദ്ര സായുധ സേന, മുനിസിപ്പല്, പഞ്ചായത്ത്, റവന്യൂ ജീവനക്കാരില് 1,44,003 പേര് ഇതുവരെ രജിസ്റ്റര് ചെയ്തു. തെരഞ്ഞെടുപ്പ് പ്രക്രിയയുമായി ബന്ധപ്പെട്ട് പ്രവര്ത്തിക്കുന്ന ഉദ്യോഗസ്ഥരുടെ രജിസ്ട്രേഷനും ആരംഭിച്ചിട്ടുണ്ട്.