Kerala
പോലീസിനെ ആക്രമിച്ച് പ്രതിയെ മോചിപ്പിച്ച കേസ്; ഏഴ് സി പി എം പ്രവര്ത്തകര് കീഴടങ്ങി
കോഴിക്കോട് | കുറ്റ്യാടിയില് പോലീസിനെ ആക്രമിച്ച് പ്രതിയെ മോചിപ്പിച്ച കേസില് ബ്രാഞ്ച് സെക്രട്ടറി ആമ്പാത്ത് അശോകന് ഉള്പ്പടെ ഏഴ് സി പി എം പ്രവര്ത്തകര് കീഴടങ്ങി. കുറ്റ്യാടി പോലീസ് സ്റ്റേഷനില് എത്തിയാണ് ഇവര് കീഴടങ്ങിയത്. ഇക്കഴിഞ്ഞ ഞായറാഴ്ചയാണ് കേസിനാസ്പദമായ സംഭവം. ബി ജെ പിയുടെ പ്രാദേശിക നേതാവ് വിലങ്ങോട്ടില് മണിയെ ബോംബെറിഞ്ഞ ശേഷം വെട്ടിപ്പരുക്കേല്പ്പിച്ച് കൊലപ്പെടുത്താന് ശ്രമിച്ച കേസിലെ പ്രതിയാണ് അശോകന്. തുടര്ച്ചയായി കോടതിയില് ഹാജരാകാത്തതിനെ തുടര്ന്ന് ഇയാളെ അറസ്റ്റ് ചെയ്യാന് പോലീസ് വീട്ടിലെത്തിയതോടെയാണ് സംഭവങ്ങളുടെ തുടക്കം.
കുറ്റ്യാടി എസ് ഐ. അനീഷിന്റെ നേതൃത്വത്തിലുള്ള സംഘമാണ് അറസ്റ്റ് ചെയ്യാനെത്തിയത്. പോലീസിനൊപ്പം ചെല്ലാമെന്ന് ആദ്യം പറഞ്ഞ അശോകന് ശുചിമുറിയില് പോകണമെന്ന് പറയുകയും തുടര്ന്ന് പാര്ട്ടി പ്രവര്ത്തകരെ വിളിച്ചു വരുത്തുകയുമായിരുന്നു. പിന്നീട് വലിയൊരു സംഘം വീട്ടിലെത്തുകയും പോലീസിനെ ആക്രമിച്ച് ആശോകനെ മോചിപ്പിച്ച് കൊണ്ടുപോവുകയുമായിരുന്നു.