മുഖ്യമന്ത്രി സമരത്തെ ഒറ്റിക്കൊടുക്കുന്നു; തീവ്രചിന്താഗതിക്കാരെ പുറത്ത് നിര്‍ത്തിയവരാണ് മഹല്ല് കമ്മറ്റികള്‍: യൂത്ത് ലീഗ്

കോഴിക്കോട് | മഹല്ല് കമ്മിറ്റികളെ അപമാനിക്കുകയും പൗരത്വ ഭേഭഗതി നിയമത്തെ എതിര്‍ക്കുന്ന സമരങ്ങളെ ഒറ്റിക്കൊടുക്കുകയും ചെയ്യുന്ന പ്രസ്താവനയാണ് മുഖ്യമന്ത്രി നടത്തിയതെന്ന് യൂത്ത് ലീഗ് സംസ്ഥാന ജന.സെക്രട്ടറി പി കെ ഫിറോസ്. സമസ്ത (ഇ കെ വിഭാഗം) യുടെ നേതൃത്വത്തിലുള്ള മഹല്ലുകളും കാന്തപുരം എ പി അബൂബക്കര്‍ മുസ്ല്യാര്‍ നേതൃത്വം നല്‍കുന്ന മഹല്ല് കമ്മിറ്റികളും മുജാഹിദ് പ്രസ്ഥാനങ്ങള്‍ നേതൃത്വം നല്‍കുന്ന മഹല്ല് കമ്മിറ്റികളുമൊക്കെ നാളിതു വരെയായി എസ് ഡി പി ഐയെയും അത്തരം തീവ്രവാദ ചിന്താഗതിക്കാരെയും പടിക്കു പുറത്ത് നിര്‍ത്തിയവരാണെന്ന് അദ്ദേഹം ഫേസ്ബുക്കില്‍ കുറിച്ചു. മഹല്ല് കമ്മറ്റി അംഗമായി പോലും ഇത്തരം ആശയക്കാര്‍ വരാതെ ശ്രദ്ധിക്കുന്നവരാണ്. അങ്ങിനെയുള്ളവര്‍ക്ക് നുഴഞ്ഞ് കയറാനാവാത്ത വിധം അവരുടെ കോട്ട ഭദ്രവുമാണ്.

വസ്തുത ഇതായിരിക്കെ, പൗരത്വഭേഭഗതി നിയമത്തിനെതിരെയുള്ള സമരത്തെ താറടിക്കാന്‍ ആര്‍ എസ് എസ് നടത്തുന്ന പ്രചരണമാണ് മുഖ്യമന്ത്രി ഇപ്പോള്‍ ഏറ്റെടുത്തിരിക്കുന്നതെന്ന് ഫിറോസ് ആരോപിച്ചു.
മഹല്ലുകളില്‍ നിന്നും എസ് ഡി പി ഐയെ പുറത്താക്കാന്‍ കമ്മിറ്റികള്‍ കാണിച്ച ധീരത അങ്ങയുടെ പാര്‍ട്ടി പ്രവര്‍ത്തകരോട് മാതൃകയാക്കാന്‍ പറയണമെന്നും അദ്ദേഹം പറഞ്ഞു.