യു ഡി എഫിന് വോട്ടുചെയ്തവരും മനുഷ്യ മഹാശൃംഖലയില്‍ കണ്ണികളായി: മുരളീധരന്‍

കോഴിക്കോട് | യു ഡി എഫിന് വോട്ടുചെയ്ത ആളുകളും ഇടതുമുന്നണി സംഘടിപ്പിച്ച മനുഷ്യ മഹാശൃംഖലയിൽ  കണ്ണികളായെന്ന്​ കെ മുരളീധരന്‍ എം പി. ഭയപ്പെട്ടുപോയ ന്യൂനപക്ഷങ്ങള്‍ക്ക് രക്ഷകരാകാന്‍ യു ഡി എഫിന് സാധിച്ചില്ലെന്നും താനടക്കം ജയിച്ചത്​ ആ മനുഷ്യരുടെ വോട്ടുകൊണ്ടാണെന്നും മുരളീധരൻ പറഞ്ഞു. കോഴിക്കോട്ടെ കോണ്‍ഗ്രസ് വേദിയിലായിരുന്നു വിമര്‍ശനം.

താമരക്കുമ്പിളില്‍ അല്ല മമ ഹൃദയമെന്ന് പരിഹസിച്ച മുരളീധരൻ രാഷ്​ട്രീയ ജീവിതത്തിൽ ഒരിക്കലും അ​ങ്ങനൊരു ചിന്ത ഉണ്ടായിട്ടില്ലെന്നും പറഞ്ഞു. കെ പി സിസി പട്ടികയില്‍ യുവാക്കളും സ്ത്രീകളും കുറഞ്ഞത് ന്യൂനതയായെന്നും അദ്ദേഹം വിമര്‍ശിച്ചു. പട്ടികയെ കുറിച്ച്​ വിമർശിച്ചത്​ രാഷ്ട്രീയകാര്യ സമിതി വിളിച്ചു ചേർക്കാത്തതിനാലാണന്നും അഞ്ച്​ മാസത്തോളമായി സമിതി വിളിച്ചു ചേർക്കാത്തത്​ ത​​​ന്റെ കുറ്റമല്ലെന്നും അദ്ദേഹം കൂട്ടിച്ചേർത്തു.

എൽ ഡി എഫ് സംഘടിപ്പിച്ച  മനുഷ്യ മഹാശൃംഖലയില്‍ ജാതിമത പ്രായ ഭേദമന്യേ ലക്ഷക്കണക്കിനാളുകളാണ് പങ്കെടുത്തത്.