നാവിക സേനയില്‍ എന്‍ജിനീയറാകാം; പ്ലസ്ടുക്കാര്‍ക്ക് അപേക്ഷിക്കാം

Posted on: June 6, 2019 5:01 pm | Last updated: June 6, 2019 at 5:01 pm


നാവിക സേനയില്‍ എന്‍ജിനീയറാകാന്‍ പ്ലസ്ടുക്കാര്‍ക്ക് അവസരം. ഏഴിമല നേവല്‍

അക്കാദമിയിലേക്കാണ് 10+2 കേഡറ്റ് (ബി ടെക്) എന്‍ട്രി സ്‌കീമിലേക്ക് അപേക്ഷ ക്ഷണിച്ചിരിക്കുന്നത്. തിരഞ്ഞെടുക്കപ്പെടുന്നവര്‍ക്ക് നാലുവര്‍ഷത്തെ ബി ടെക് കോഴ്‌സിന് പ്രവേശനം ലഭിക്കും. ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങളില്‍ മികച്ച മാര്‍ക്കോടെ പ്ലസ്ടു പാസായ അവിവാഹിതരായ ആണ്‍കുട്ടികള്‍ക്ക് അപേക്ഷിക്കാം. മക്കാനിക്കല്‍ എന്‍ജിനീയറിങ്, അപ്ലൈഡ് ഇലക്ട്രോണിക്സ് ആന്‍ഡ് കമ്യൂണിക്കേഷന്‍, ഇലക്ട്രോണിക്സ് ആന്‍ഡ് കമ്യൂണിക്കേഷന്‍ എന്‍ജിനീയറിങ് ബ്രാഞ്ചുകളില്‍ ഏതെങ്കിലുമൊന്ന് തിരഞ്ഞെടുക്കാവുന്നതാണ്.

നാലുവര്‍ഷത്തെ കോഴ്‌സ് വിജയകരമായി പൂര്‍ത്തിയാക്കുന്നവര്‍ക്ക് ജവഹര്‍ലാല്‍ നെഹ്‌റു സര്‍വകലാശാല (ജെ എന്‍ യു) യുടെ ബി ടെക് ബിരുദവും 83,448 രൂപ ശമ്പള സ്‌കെയിലില്‍ നേവിയില്‍ സബ് ലെഫ്റ്റനന്റ് പദവിയും ലഭിക്കും. കമാന്‍ഡര്‍ പദവി വരെ ഉയരാവുന്ന തസ്തികയാണിതെന്ന പ്രത്യേകതയുമുണ്ട്.

യോഗ്യത: ഫിസിക്സ്,കെമിസ്ട്രി, മാത്തമാറ്റിക്സ് വിഷയങ്ങളില്‍ 70 ശതമാനം മാര്‍ക്കോടെ പ്ലസ്ടു. എസ് എസ് എല്‍ സി തലത്തിലോ പ്ലസ്ടു തലത്തിലോ ഇംഗ്ലീഷിന് മിനിമം 50 ശതമാനം മാര്‍ക്ക് നേടിയിരിക്കണം. അപേക്ഷകര്‍ 2019 ജെ ഇ ഇ (മെയിന്‍) പരീക്ഷ എഴുതിയിരിക്കണം. ജെ ഇ ഇ (മെയിന്‍) അഖിലേന്ത്യാ റാങ്കിന്റെ അടിസ്ഥാനത്തിലായിരിക്കും തിരഞ്ഞെടുപ്പ്.

പ്രായം: 02-07-2000-നും 01-01-2003നും ഇടയില്‍ (രണ്ട് തീയതികളും ഉള്‍പ്പെടെ) ജനിച്ചവര്‍ മാത്രമാണ് അപേക്ഷിക്കാന്‍ പറ്റുക.

ഫിസിക്കല്‍യോഗ്യത: ഉയരം: 157 സെ.മീ. പ്രായത്തിനനുസരിച്ച തൂക്കം. മികച്ച കാഴ്ചശക്തി. വര്‍ണാന്ധത, നിശാന്ധത എന്നിവ പാടില്ല.

അപേക്ഷിക്കേണ്ട വിധം: www.joinindiannavy.gov.in എന്ന വെബ്‌സൈറ്റിലൂടെ മെയ് 31 മുതല്‍ ഓണ്‍ലൈന്‍ ആയാണ് അപേക്ഷിക്കേണ്ടത്. വെബ്‌സൈറ്റില്‍ പ്രവേശിക്കുന്നതിനുമുമ്പായി 10 കെ ബി യില്‍ കുറവ് വലുപ്പമുള്ള പാസ്പോര്‍ട്ട് സൈസ് ഫോട്ടോ അപേക്ഷാഫോറത്തിന്റെ നിര്‍ദ്ദിഷ്ട കോളത്തില്‍ അപ്ലോഡ് ചെയ്യണം.

എസ് എസ് എല്‍ സി, പ്ലസ്ടു സര്‍ട്ടിഫിക്കറ്റുകള്‍, മാര്‍ക്ക്‌ലിസ്റ്റുകള്‍, ജെ ഇ ഇ. (മെയിന്‍) സ്‌കോര്‍കാര്‍ഡ് എന്നിവയും പി ഡി എഫ് ഫയല്‍ ഫോര്‍മാറ്റില്‍ ഓണ്‍ലൈന്‍ അപേക്ഷയ്ക്കൊപ്പം അപ്ലോഡ് ചെയ്യണം. ഓണ്‍ലൈനായി അപേക്ഷിച്ച ശേഷം പ്രിന്റൗട്ട് എടുത്ത് സൂക്ഷിക്കാന്‍ മറക്കരുത്. ഓണ്‍ലൈനില്‍ അപേക്ഷക്കാവുന്ന അവസാനതീയതി: 2019 ജൂണ്‍ 17 ആണ്.