ശൈഖ് സുൽത്താനെ യുനെസ്‌കോ ആദരിച്ചു

ഷാർജ|അറബി ഭാഷയുടെ ചരിത്ര കോർപ്പസ് പൂർത്തിയാക്കിയതിന്റെയും യുനെസ്‌കോയുടെ ലൈബ്രറിയിൽ ഔദ്യോഗികമായി ഉൾപ്പെടുത്തിയതിന്റെയും ആഘോഷത്തിന്റെ ഭാഗമായി യു എ ഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയെ ഐക്യരാഷ്ട്രസഭയുടെ വിദ്യാഭ്യാസ, ശാസ്ത്ര, സാംസ്‌കാരിക സംഘടന (യുനെസ്‌കോ) ആദരിച്ചു.

“അറബിക് ഭാഷ: പൈതൃകത്തിനും അറിവിനും ഇടയിലുള്ള ഒരു പാലം’ എന്ന വിഷയത്തിൽ പാരീസിലെ യുനെസ്‌കോയുടെ ആസ്ഥാനത്ത് നടന്ന ഔപചാരിക ചടങ്ങിലാണ് ആദരവ് നടന്നത്. ഷാർജ ഭരണാധികാരിയുടെ പത്‌നിയും കുടുംബകാര്യ സുപ്രീം കൗൺസിൽ ചെയർപേഴ്സണുമായ ശൈഖ ജവഹർ ബിൻത് മുഹമ്മദ് അൽ ഖാസിമി, ഷാർജ ബുക്ക് അതോറിറ്റി ചെയർപേഴ്സൺ ശൈഖ ബുദൂർ ബിൻത് സുൽത്താൻ അൽ ഖാസിമി എന്നിവർ ചടങ്ങിൽ പങ്കെടുത്തു.

യുനെസ്‌കോ ഡയറക്ടർ ജനറൽ ഓഡ്രി അസോലെ, ഫ്രാൻസിലെ യു എ ഇ അംബാസഡർ ശൈഖ് ഡോ. സുൽത്താൻ ബിൻ മുഹമ്മദ് അൽ ഉവൈസ്, ഷാർജ സാംസ്‌കാരിക വകുപ്പ് ചെയർമാൻ അബ്ദുല്ല ബിൻ മുഹമ്മദ് അൽ ഉവൈസ്, ജമാൽ സാലിം അൽ തുറൈഫി, ഡോ. അഹ്്മദ് ബിൻ റക്കദ് അൽ ആമിരി, അലി അൽഹാജ് അൽ അലി, ജനറൽ മുഹമ്മദ് ഹസൻ ഖലാഫ്, താരിഖ് സഈദ് സന്നിഹിതരായി.

ഷാർജയും യുനെസ്‌കോയും ആർക്കൈവ്‌സ് കരാറിൽ ഒപ്പുവച്ചു

ആർക്കൈവുകൾ ഡിജിറ്റൈസ് ചെയ്യുന്നതിനുള്ള ആറ് മില്യൺ യു എസ് ഡോളർ ഗ്രാന്റ് കരാറിൽ ഷാർജ ബുക്ക് അതോറിറ്റി (എസ് ബി എ) ഒപ്പുവച്ചു. സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി ചടങ്ങിന് സാക്ഷ്യം വഹിച്ചു. പാരീസിലെ യുനെസ്‌കോ ആസ്ഥാനത്ത് നടന്ന ചടങ്ങിൽ ഷാർജ സുപ്രീം കൗൺസിൽ ഫോർ ഫാമിലി അഫയേഴ്‌സ് ചെയർപേഴ്‌സൺ ശൈഖ ജവഹർ ബിൻത് മുഹമ്മദ് അൽ ഖാസിമിയും യുനെസ്‌കോ ഡയറക്ടർ ജനറൽ ഓഡ്രി അസോലെയും സന്നിഹിതരായിരുന്നു.

ആഗോള പൈതൃകം സംരക്ഷിക്കുന്നതിനും പ്രധാന രേഖകൾ ഡിജിറ്റലൈസ് ചെയ്ത് ലഭ്യമാക്കുന്നതിനും ലക്ഷ്യമിടുന്നതാണ് ഈ അഞ്ച് വർഷ പദ്ധതി. പുസ്തകങ്ങൾ, കൈയെഴുത്തുപ്രതികൾ, ഓഡിയോ റെക്കോർഡിംഗുകൾ, ഡോക്യുമെന്ററികൾ, മറ്റ് ആർക്കൈവൽ മെറ്റീരിയലുകൾ എന്നിവയുടെ ഡിജിറ്റലൈസേഷൻ പദ്ധതിയിൽ ഉൾപ്പെടുന്നു. ചരിത്രപരമായ രേഖകൾ ഭാവിതലമുറക്ക് ലഭ്യമാക്കുകയാണ് ലക്ഷ്യം.