വില്‍പ്പന നടത്തിയ വീടിന്റെ താക്കോല്‍ കൈമാറാന്‍ പോകവെ ബൈക്കിടിച്ച് മരിച്ചു

കോട്ടയം |  വീട് വിറ്റ് സാധനങ്ങള്‍ മാറ്റിയ ശേഷം പുതിയ വീട്ടുടമയ്ക്ക് താക്കോല്‍ കൈമാറാന്‍ പോകുന്നതിനിടെ ബൈക്ക് ഇടിച്ച് മാങ്ങാനം സ്വദേശിയായ ഗൃഹനാഥന് ദാരുണാന്ത്യം. പുതുപ്പള്ളി – പാലൂര്‍പ്പടി റോഡില്‍ മാങ്ങാനത്ത് ചെമ്മരപ്പള്ളിയ്ക്ക് സമീപമാണ് അപകടം ഉണ്ടായത്. അപകടത്തില്‍ ചെമ്മരപ്പള്ളി സ്വദേശിയായ ചെമ്പകശേരില്‍ സി പി പൗലോസിന്റെ മകന്‍ സി പി ജേക്കബ് (കൊച്ചുമോന്‍ -58) ആണ് മരിച്ചത്. വെള്ളിയാഴ്ച രാത്രി 9.30ന് ഉണ്ടായ അപകടത്തില്‍ പരുക്കേറ്റ് മാങ്ങാനം മന്ദിരം ആശുപത്രിയില്‍ ചികിത്സയിലായിരുന്ന ജേക്കബ്, വിദഗ്ധ ചികിത്സയ്ക്കായി എത്തിച്ച കോട്ടയം മെഡിക്കല്‍ കോളേജ് ആശുപത്രിയില്‍ വച്ച് രാത്രി 12.30 ഓടെയാണ് മരിച്ചത്.

മാങ്ങാനം ചെമ്മരപ്പള്ളിയ്ക്ക് സമീപത്തെ ജേക്കബിന്റെ വീട് നേരത്തെ വിറ്റിരുന്നു. ഇന്നലെയാണ് ജേക്കബ് വീട് കാലിയാക്കിയ ശേഷം ഉടമയ്ക്ക് താക്കോല്‍ കൈമാറേണ്ട തീയതി. ഇതിനായി പുതിയ വീട്ടില്‍ സാധനങ്ങള്‍ ഇറക്കിയ ശേഷം താക്കോലുമായി ലോറിയില്‍ ജേക്കബ് പഴയ വീടിനു സമീപം എത്തി. ഇവിടെ ലോറിയില്‍ നിന്നും റോഡിലേയ്ക്ക് ഇറങ്ങുന്നതിനിടെ എത്തിയ ബൈക്ക് ജേക്കബിനെ ഇടിയ്ക്കുകയായിരുന്നു. ഇടിയുടെ ആഘാതത്തില്‍ റോഡില്‍ തലയിടിച്ചാണ് ജേക്കബ് വീണത്.

ബോധരഹിതനായി റോഡില്‍ കിടന്ന ജേക്കബിനെ ഉടന്‍ തന്നെ മാങ്ങാനം മന്ദിരം ആശുപത്രിയില്‍ പ്രവേശിപ്പിച്ചു. തുടര്‍ന്ന് വിദഗ്ധ ചികിത്സയ്ക്കായി കോട്ടയം മെഡിക്കല്‍ കോളേജ് ആശുപത്രിയിലേയ്ക്കു മാറ്റി. എന്നാല്‍, രാത്രിയോടെ മരണം സംഭവിക്കുകയായിരുന്നു. സംസ്‌കാരം തിങ്കളാഴ്ച ഐപിസ് കര്‍മ്മേല്‍ സഭയുടെ ചലമ്പ്രക്കുന്ന് സെമിത്തേരിയില്‍. ഭാര്യ: സെലിന്‍ ജേക്കബ് കളത്തിപ്പടി പുതുപ്പറമ്പില്‍ കുടുംബാംഗമാണ്. മക്കള്‍: നീതു സാറ ജേക്കബ് ( സ്റ്റാഫ് നഴ്സ് ദുബൈ) പാസ്റ്റര്‍ നിതീഷ് പോള്‍ ജേക്കബ് (ലൈറ്റ് റ്റവര്‍ ചര്‍ച്ച് ഓഫ് ഗോഡ്. തൃക്കൊടിത്താനം).
മരുമക്കള്‍ – അഖില്‍ മാത്യു (ദുബൈ), ലിറ്റാമോള്‍ഐസക്ക് (മാങ്ങാനം)