ഇറാന്‍-ഇസ്‌റാഈല്‍ സംഘര്‍ഷം വേഗത്തില്‍ അവസാനിപ്പിക്കണം: യു എ ഇ

ദുബൈ | ഇറാന്‍-ഇസ്‌റാഈല്‍ സംഘര്‍ഷം വേഗത്തില്‍ അവസാനിപ്പിക്കണമെന്ന് യു എ ഇ പ്രസിഡന്റ് ശൈഖ് മുഹമ്മദ് ബിന്‍ സായിദ് അല്‍ നഹ്‌യാന്റെ നയതന്ത്ര ഉപദേഷ്ടാവ് ഡോ. അന്‍വര്‍ ഗര്‍ഗാഷ് ആവശ്യപ്പെട്ടു. പ്രതിസന്ധി നീണ്ടുനിന്നാല്‍ ‘ദുഷ്‌കരമായ അനന്തരഫലങ്ങള്‍’ ഉണ്ടാകുമെന്ന് അദ്ദേഹം മുന്നറിയിപ്പ് നല്‍കി.

യുദ്ധം ഗള്‍ഫ് മേഖലയെ പിന്നോട്ട് വലിക്കുകയാണ്. യുദ്ധം എത്രത്തോളം നീണ്ടുനില്‍ക്കുന്നുവോ അത്രത്തോളം അപകടകരമാകും. ഇസ്‌റാഈലും ഇറാനും തമ്മിലുള്ള ഏതൊരു നീണ്ട ഏറ്റുമുട്ടലോ യുദ്ധമോ വളരെ ദുഷ്‌കരമായ അനന്തരഫലങ്ങള്‍ മാത്രമേ ഉണ്ടാക്കൂ. വ്യോമാക്രമണത്തിന് മുമ്പ് ചര്‍ച്ച നടത്താന്‍ യു എസ് പ്രസിഡന്റ് ഡൊണാള്‍ഡ് ട്രംപ് ഇറാന് പരമാവധി രണ്ടാഴ്ച സമയം നല്‍കിയിട്ടുണ്ട്. എന്നാല്‍ ആക്രമണത്തിനിടയില്‍ ചര്‍ച്ചകള്‍ നടത്തില്ലെന്ന് ടെഹ്‌റാന്‍ പറഞ്ഞു.

സദ്ദാം ഹുസൈനെ അട്ടിമറിച്ചെങ്കിലും രാജ്യത്തെ വിഭജിക്കുകയും അസ്ഥിരപ്പെടുത്തുകയും ചെയ്ത 2003-ലെ യു എസ് നേതൃത്വത്തിലുള്ള ഇറാഖ് അധിനിവേശത്തിന്റെ പ്രത്യാഘാതങ്ങള്‍ മധ്യ പൗരസ്ത്യ ദേശം ഇപ്പോഴും നേരിടുന്നു.

ആഗോള എണ്ണ ഉത്പാദനത്തിന്റെ അഞ്ചിലൊന്ന് വഹിക്കുന്ന ഇറാനും അറേബ്യന്‍ പെനിന്‍സുലയും തമ്മില്‍ ഹോര്‍മുസ് കടലിടുക്കിനെ തടസ്സപ്പെടുത്തുന്നതാണ് നിലവിലെ യുദ്ധത്തിന്റെ ഒരു പ്രധാന അപകടം. ഈ യുദ്ധം ഗള്‍ഫ് രാജ്യങ്ങള്‍ കെട്ടിപ്പടുക്കാന്‍ ആഗ്രഹിക്കുന്ന പ്രാദേശിക ക്രമത്തിന് വിഘാതമാകും. ഇത് പിന്നോട്ട് വലിക്കുകയാണെന്ന് തോന്നുന്നു. യു എ ഇയെ മാത്രമല്ല, മേഖലയെയും- അന്‍വര്‍ ഗര്‍ഗാഷ് പറഞ്ഞു.